شہر قائد میں رینجرز کے تعاون سے فری میڈیکل کیمپ کا اہتمام گیا ہے۔ پاکستان رینجرز (سندھ) نے ساؤتھ سٹی ہسپتال کلفٹن کے تعاون سے کراچی کے علاقے آر سی ڈی گراؤنڈ سعود آباد میں فری میڈیکل کیمپ کا اہتمام کیا ہے۔ فری میڈیکل کیمپ میں علاقے کے غریب اور مستحق افراد کو مفت طبی سہولیات مہیا کی گئی ہیں۔
فری میڈیکل کیمپ میں ڈیباٹالوجسٹ، ای این ٹی اسپیشلسٹ، میڈیکل اسپیشلسٹ، چائلڈ اسپیشلسٹ، جنرل فزیشن، آئی اسپیشلسٹ،ہومیو پیتھک، گائنا کالوجسٹ اور رینجرز کے ڈاکٹرز نے 16000سے زائد مریضوں جن میں خواتین، بچے اور بزرگ بھی شامل تھے کا طبی معائنہ کیا اورمفت ادویات فراہم کی گئی ہیں۔
ترجمان سندھ رینجرز نے کہا کہ میڈیکل کیمپ میں مریضوں کے شوگر،ای سی جی، کولیسٹرول ٹیسٹ، الٹراساؤنڈ، کورونا، پولیو اورخسرہ سے بچاؤ کی ویکسین بھی لگائی گئی۔ فری میڈیکل کیمپ میں مستحق افراد میں راشن بھی تقسیم کیا گیا اور بچوں کے کھیلنے کے لیے جھولے بھی لگائے گئے۔
ترجمان سندھ رینجرز کا کہنا تھا کہ مختلف شعبہ ہائے زندگی سے تعلق رکھنے والی اہم سول،سماجی، سیاسی شخصیات، پولیس اور رینجرز کے اعلیٰ افسران نے فری میڈیکل کیمپ کا دورہ کیا۔ علاقے کے لوگوں نے پاکستان رینجرز سندھ کی جانب سے کیے جانے والے اس اقدام کو سراہا۔
