سندھ ہائی کورٹ نے کراچی کے مختلف اضلاع میں حلقہ بندیوں کے خلاف ایم کیوایم پاکستان کی فوری سماعت کی درخواست منظور کرتے ہوئے فریقین کو 15 نومبر کے لئے نوٹس جاری کردیا۔
سندھ ہائی کورٹ میں کراچی کے مختلف اضلاع کی حلقہ بندیوں کے خلاف متحدہ قومی موومنٹ پاکستان کی 6 درخواستوں پر سماعت ہوئی۔
ایم کیوایم کے وکیل کا مؤقف تھا کہ ضلع غربی میں یوسیز اور ٹاؤنز کی تشکیل غلط اور بدنیتی پر مبنی ہیں۔ اورنگی ٹاؤن، مومن آباد، بلدیہ ٹاؤن، نارتھ ناظم آباد اور شاہ فیصل کالونی میں حلقہ بندیاں انتہائی غلط ہیں۔
ایم کیو ایم پاکستان کے وکیل نے سندھ ہائی کورٹ کے ججز کے سامنے موقف رکھا کہ اگر حلقہ بندیاں درست نہ ہوئیں تو انتخابات منصفانہ نہیں ہوسکتے۔
عدالت نے درخواست کو سماعت کیلئے منظور کرتے ہوئے فریقین کو 15 نومبر کے لئے نوٹس جاری کردیا۔ عدالت نے آئندہ سماعت پر الیکشن کمیشن اور دیگر فریقین کو تیاری کرکے آنے کی ہدایت کرتے ہوئے سماعت ملتوی کردی۔
