کراچی میں بڑھتے ہوئے اسٹریٹ کرائم کے خلاف تاجر سرگرم ہوگئے۔ آل کراچی تاجراتحاد نے کل بروز منگل احتجاج کا اعلان کردیا۔ عوام سے بھی شرکت کی اپیل کردی۔
آل کراچی تاجر اتحاد کے چیئرمین عتیق میر نے تاجروں اور شہریوں سے اپیل کی ہے کہ منگل 8مارچ 2022سہ پہر 3بجے خالقدینا ہال پہنچ کر پُرامن احتجاجی ریلی میں شرکت کریں اور شہر کراچی کے حق میں ہماری آواز میں اپنی آواز ملائیں۔
عتیق میر کا کہنا ہے کہ کراچی ہمارا محسن ہے اس کا احسان اتارنا ممکن نہیں، اسے بدامنی کے شعلوں میں جلتا ہوا نہیں دیکھ سکتے، خود ہتھیار اٹھالیں گے لیکن اپنے بچوں اور اہلِ خانہ کی جان ڈاکوؤں، لٹیروں اور قاتلوں کے حوالے نہیں کرینگے۔
انھوں نے کہا کہ شہر میں امن کیلئے رینجرز، پولیس، شہریوں اور تاجروں نے اپنے قیمتی خون کی گرانقدر قربانیاں دیں، یہ خون رائیگاں نہیں جانے دینگے، بدقسمتی سے پولیس اور رینجرز ایک بار پھر اختیارات سے محروم ہوکر عوام کے لٹنے کا تماشا دیکھ رہے ہیں جس کے نتیجے میں شہر ایک بار پھر جرائم کا جنگل بن گیا ہے۔
چیئرمین کراچی تاجراتحاد نے اس عزم کا اظہار کیا کہ شہر سے بدامنی کے مکمل خاتمے تک قیامِ امن کے مطالبے سے پیچھے نہیں ہٹیں گے، شہر کا درد رکھنے والے تمام طبقات سے اسٹریٹ کرائم کے خلاف اپنی اپنی سطح پر آواز اٹھائیں یا ہمارا ساتھ دیں تو حکومت کو بدامنی کے خاتمے کیلئے 2013جیسی حکمت عملی اختیار کرنے پر مجبور کردینگے۔
عتیق میر کا کہنا تھاکہ 2008 میں بھی کراچی میں جرائم عروج پر تھے۔ اب وہی لٹیرے جنکی تعداد 8 ہزار بتائی جارہی ہے۔ عدالتوں سے ضمانت کرواکے جرائم کی دنیا میں واپس آگئے ہیں اور ڈکیتی کی واردات کے دوران شہریوں کو بے دریغ قتل کررہے ہیں۔
کراچی تاجراتحاد کے چیئرمین کا کہنا تھاکہ ماضی کی طرح ہمیں پھر اپنا مثبت کردار ادا کرنا ہوگا۔ شہر ایک بار پھر ہم سب کو پکاررہا ہے، تاجرانِ شہر اور شہری اپنے گھرانے کی جان و مال کی حفاظت کیلئے اپنے روشن کاروباری مستقبل کیلئے اپنے پیارے شہر کراچی کے امن، خوشحالی اور رونقوں کی بحالی کیلئے احتجاجی ریلی میں شریک ہوکر اس جہاد میں اپنا حصہ ڈالیں۔
