کراچی کے علاقے نارتھ ناظم آباد بلاک ایچ سے لاپتہ ہونے اور پھر بازیاب ہونے والے کمسن بہن بھائیوں کو بڑی خالہ کے گھر منتقل کر دیا گیا۔ گھر پر لیڈی پولیس کو بھی تعینات کردیا گیا ہے۔
میڈیا رپورٹس کے مطابق پولیس حکام نے 12 سالہ محمد ایان اور 11 سالہ انابیہ ناز کو بڑی خالہ کے گھر منتقل کیا ہے۔ بچوں کو عدالت میں پیش کیا جائے گا اور عدالتی فیصلےکی روشنی میں بچوں کی حوالگی مکمل کی جائے گی۔
پولیس نے دونوں بہن بھائیوں کی منتقلی کے بعد بڑی خالہ کے گھر پر لیڈی پولیس کانسٹیبل بھی تعینات کر دی ہیں جو بچوں کی حوالگی کا فیصلہ ہونے تک تعینات رہے گی۔
واضح رہے کہ گزشتہ شب نارتھ ناظم آباد سے بہن بھائی لاپتہ ہوگئے تھے جو کئی گھنٹے بعد آج بازیاب ہوگئے۔ دونوں بچے کراچی میں ماموں کے ساتھ رہائش پذیر تھے۔ بچوں کے والدین میں 8 سال قبل علیحدگی ہوگئی تھی اور والدہ اس وقت دبئی میں ملازمت کرتی ہیں۔
بچوں کی بازیابی پر والدہ کا کہنا تھا کہ جو لوگ بچوں کو لے کر گئے وہی انہیں حیدری چھوڑ کر چلے گئے تھے، مجھے پرائیویٹ نمبر سے فون آیا، بچوں کی بازیابی کی اطلاع بھائی کو دی، بھائی نے پولیس اور رینجرز کے ہمراہ موقع پر بچوں کو تحویل میں لیا۔
دوسری جانب بچوں انابیہ اور ایان نے پولیس کو بیان دیا ہے کہ ہم اپنی مرضی سے گھر سے نکلے تھے، ایک انکل آنٹی کے گھر رات گزاری، نانی ہم پر تشدد کرتی تھیں، خالہ ہم سے واش روم صاف کرواتی تھی۔
