اعلیٰ ثانوی تعلیمی بورڈ کراچی نے پہلے مرحلے میں انٹرمیڈیٹ حصہ دوم کے تمام گروپس کے سالانہ امتحانات برائے 2023ء کی تاریخوں کا اعلان کردیا۔
انٹربورڈ کی جانب سے امتحانی شیڈول جاری کر دیا گیا ہے جس کے مطابق سالانہ امتحانات 30 مئی بروز منگل سے 27 جون 2023 تک جاری رہیں گے۔ سائنس اور ہوم اکنامکس کے امتحانات صبح جبکہ آرٹس اور کامرس گروپ کے امتحانات دوپہر کے شفٹ میں لئے جائیں گے۔
سائنس پری میڈیکل، پری انجینئرنگ، سائنس جنرل، ہوم اکنامکس، کامرس ریگولر، کامرس پرائیویٹ آرٹس ریگولر، آرٹس پرائیویٹ، خصوصی امیدواروں اور ڈپلومہ ان فزیکل ایجوکیشن کے امتحانات بروز منگل 30 مئی 2023ء سے شروع ہورہے ہیں۔
انٹرمیڈیٹ کے خصوصی امیدواروں کے حصہ اول اور حصہ دوم دونوں کے امتحانات پہلے مرحلہ میں لیے جارہے ہیں۔ انٹرمیڈیٹ کے فیل شدہ طلبہ، اسپیشل چانس، امپروومنٹ آف ڈویژن /گریڈ، بارہ پرچوں کے تمام امیدوار امتحانات میں شریک ہوں گے۔
چیرمین انٹر بورڈ پروفیسر ڈاکٹر سعید الدین کا کہنا ہے کہ انٹرمیڈیٹ کے حصہ اول (فریش) کے تمام گروپس کے امتحانات دوسرے مرحلہ میں لیے جائیں گے جس کی تاریخوں کا اعلان بعد میں کیا جائے گا۔
انٹرمیڈیٹ کے سالانہ امتحانات برائے 2023ء میں فیل اور امپروومنٹ آف گریڈ کے طلبہ کے پرچے پرانے نصاب کے تحت لیے جائیں گے جبکہ انٹرمیڈیٹ کے امتحانات میں پہلی دفعہ شریک ہونے والے طلبہ کے پرچے نئے نصاب کے تحت لیے جائیں گے۔
