-
-
ماحولیاتی نمونوں میں پولیو وائرس کی موجودگی کے باعث کراچی اور بلوچستان میں خصوصی انسدادِ پولیو مہم چلانے کا فیصلہ کیا گیا ہے۔
جیو نیوز کے مطابق نگراں وزیرِ صحت سندھ ڈاکٹر سعد خالد نیاز نے اپنے بیان میں کہا ہے کہ کراچی میں آج سے 5 نومبر تک پولیو مہم جاری رہے گی جسکے دوران ٹیمیں گھر گھر جاکر 5 سال تک بچوں کو پولیو کے قطرے پلائیں گی۔
وزیرصحت سندھ کے مطابق پولیو مہم کے دوبارہ آغاز کا فیصلہ کراچی میں حالیہ پولیو کیس کے بعد کیا گیا ہے۔ ڈاکٹر سعد خالد نیاز کا کہنا ہے کہ اس وقت صرف افغانستان اور پاکستان میں پولیو وائرس موجود ہے، پولیو سے پاک پاکستان کے لیے مشترکہ کوشش کرنی ہے۔
ایمرجنسی آپریشن سینٹر بلوچستان کے مطابق بلوچستان کے ماحولیاتی نمونوں میں پولیو وائرس کی موجودگی کی وجہ سے خصوصی مہم چلانے کا فیصلہ کیا گیا ہے۔
بلوچستان کے 10 اضلاع میں انسدادِ پولیو مہم کی خصوصی مہم کا آج سے آغاز کیا جا رہا ہے جس میں آواران، ڈیرہ بگٹی، گوادر، اوستہ محمد، حب، جعفر آباد، خضدار، لسبیلہ، نصیرآباد اور صحبت پور شامل ہیں۔
ای او سی حکام کے مطابق ان اضلاع میں 7 لاکھ 80 ہزار بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ کوئٹہ، پشین، قلعہ عبداللّٰہ اور چمن میں خصوصی پولیو مہم ملتوی کر دی گئی ہے۔ بلوچستان کے ان 4 اضلاع میں انسدادِپولیو مہم کی تاریخ کا اعلان بعد میں کیا جائے گا۔
