-
-
شہرقائد میں الفلاح کے علاقے سے اغواء ہونے والی 14 سالہ بچی کے کیس میں نیا موڑ آگیا۔ مغوی دعا زہرہ کے والد کو تاوان کیلئے فون کال ملنے کا انکشاف ہوا ہے۔ دعا کے والد نے تمام تفصیلات پولیس کو فراہم کردیں۔
کراچی کے علاقے الفلاح تھانے کی حدود سے 14سال کی دعا زہرہ کے لاپتہ ہونے کے معاملے پر اینٹی وائلنٹ کرائم سیل کی تفتیشی ٹیم نے فیملی سے رابطہ کیا اور ایس ایس پی اے وی سی سی نے لاپتہ بچی کے والد سے ملاقات کی۔
بچی کے والد نے پولیس کو تاوان کی کال ملنے کا انکشاف کرتے ہوئے کہا انہیں دو نمبروں سےتاوان کیلئے کال موصول ہوئی ہیں، ایک موبائل نمبر سے جبکہ ایک کال واٹس ایپ نمبر سے کی گئی۔
والد نے بیان میں بتایا کہ انہوں نے پولیس کو دونوں نمبروں سمیت تمام تفصیلات فراہم کردی ہیں ، انکی کسی سے کوئی بھی دشمنی نہیں، انکی بیٹی ڈیڑھ سال سے اسکول بھی نہیں گئی تھی۔
ایس ایس پی زبیر نذیر شیخ کا کہنا ہے کہ اے وی سی سی نے 3 ٹیمیں تشکیل دے دی ہیں، ٹیمیں سی سی ٹی وی ،روڈمیپ پرکام کررہی ہیں اور گھر کے اطراف علاقے کی سی سی ٹی وی فوٹیج حاصل کرلی گئی ہیں۔
ایس ایس پی کا کہنا تھا کہ بچی کی بازیابی کے لیے پوری کوشش کر ررہےہیں، متاثرہ فیملی کیساتھ رابطہ میں ہیں، پولیس مشکل وقت میں متاثرہ فیملی کیساتھ کھڑی ہے، لڑکی کے اغوا کا مقدمہ الفلاح تھانے میں درج کیاگیا تھا۔
واضح رہے کراچی کے علاقے الفلاح گولڈن ٹاؤن سے چودہ سال کی لڑکی لاپتہ ہوگئی تھی ، اہلخانہ نے دعویٰ کیا تھا کہ ساتویں کلاس کی دعا نامی طالبہ کو اغوا کیا گیا۔
پولیس کا کہنا تھا گھر سے کچرا پھینکنے نکلی تھی پھرواپس نہیں آئی تاہم مقدمہ درج کرلیا گیا ہے اور واقعے کی مختلف پہلوؤں سے تفتیش جاری ہے۔
