پاکستان کے سب سے بڑے شہر کراچی میں آج شام سے تیز بارشوں کا سلسلہ شروع ہوسکتا ہے۔ شہرقائد میں 13 اگست تک وقفے وقفے سے موسلادھار بارش ہونے کا امکان ہے جسکے باعث اربن فلڈنگ کا بھی خدشہ ہے۔
محکمۂ موسمیات کا کہنا ہے کہ کراچی میں آج سے مون سون ہواؤں میں شدت آنے کا امکان ہے، شام میں بارش کا سلسلہ شروع ہو سکتا ہے۔ شہرِ قائد میں آئندہ 24 گھنٹوں کے دوران مطلع جزوی ابر آلود رہنے اور گرج چمک کے ساتھ بارش کا امکان ہے۔
محکمۂ موسمیات نے کہا ہے کہ آج شام یا رات سے 13 اگست کے دوران کراچی میں گرج چمک کے ساتھ بارش کا امکان ہے۔ اس دوران شہر کے مختلف علاقوں میں کہیں متعدل اور کہیں موسلادھار بارش ہو سکتی ہے۔
محکمہ موسمیات کے مطابق سندھ کے دیگر اضلاع میں بھی تیز بارش کا امکان ہے۔ موسلادھار بارشوں کے نتیجے میں کراچی سمیت ٹھٹہ ، بدین ، حیدرآباد اور دیگر شہری علاقوں میں سیلابی صورتحال پیدا ہونے کا خدشہ ہے۔
محکمۂ موسمیات کا کہنا ہے کہ کراچی میں کم سے کم درجۂ حرارت 28.9 ڈگری سینٹی گریڈ ریکارڈ کیا گیا جبکہ زیادہ سے زیادہ درجۂ حرارت 34 سے 36 ڈگری سینٹی گریڈ کے درمیان رہنے کا امکان ہے۔ شہر میں شمال مغرب کی سمت سے چلنے والی ہواؤں کی رفتار 14 کلو میٹر فی گھنٹہ ہے، جن میں نمی کا تناسب 89 فیصد ہے۔
محکمہ موسمیات نے ماہی گیروں کو بھی خبردار کرتے ہوئے کہا ہے کہ ماہی گیر سمندر میں جاتے ہوئے احتیاط کریں۔ سمندر میں 10 سے 13 اگست تک شدید طغیانی ہوسکتی ہے۔
