محرم الحرام کے سلسلے میں محکمہ داخلہ سندھ نے صوبے بھر میں دفعہ 144 نافذ کردی۔ کراچی سمیت صوبے بھر میں 9 اور 10 محرم الحرام کو ڈبل سواری پر پابندی عائد ہوگی۔
محکمہ داخلہ سندھ کی جانب سے صوبے میں امن و امان برقرار رکھنے کیلئے دفعہ 144 کا نفاذ کیا ہے اور اس سلسلے میں پابندیوں کا نوٹیفکیشن بھی جاری کردیا گیا ہے۔
محکمہ داخلہ سندھ کے مطابق صوبے بھر میں 28 اور 29 جولائی بروز جمعہ اور ہفتہ (9 اور 10 محرم الحرام) کو ڈبل سواری پر پابندی عائد ہوگی۔ ڈاکٹر، بچوں، خواتین، صحافی اور قانون نافذ کرنے والے اداروں کو پابندی سے استثنیٰ حاصل ہوگا۔
محکمہ داخلہ سندھ کے مطابق سندھ بھر میں محرم کے دوران اسلحہ لیکر چلنے پر پابندی عائد ہوگی۔ قانون نافد کرنے والے اداروں کے اہلکاروں کے علاوہ کسی کو اسلحہ لیکر چلنے کی اجازت نہیں ہے۔
مجالس اور امام بارگاہ کے علاوہ 5 افراد سے زیادہ کھڑے ہونے پر پابندی کردی گئی ہے جبکہ ہوٹلز اور عوامی مقامات پر وی سی آر اور فلموں کی نمائش پر بھی پابندی عائد کردی گئی ہے۔
