کراچی اور لاہور میں عید کے دوسرے روز جھولے سے بچوں کے گرنے کے واقعات پیش آئے۔ کراچی میں سفاری پارک جبکہ لاہور میں ریس کورس میں جھولا جھولنے کے دوران بچے جھولے سے گرکر زخمی ہوئے۔
سفاری پارک کراچی میں 10 سالہ بچہ احمد رولرکوسٹر جھولے سے گرکر زخمی ہوا۔ ڈان اور جیو نیوز کے مطابق پولیس کا کہنا ہے کہ 10 سالہ احمد فیملی کے ساتھ گھومنے سفارک پارک آیا تھا۔
رولرکوسٹر جھولے میں بچہ اونچائی پر سیفٹی بیلٹ کھول کر کھڑا ہوا اور توازن برقرار نہ رکھ سکا۔ ریسکیو ذرائع کے مطابق بچے کو فوری طور پر اسپتال منتقل کردیا گیا۔
واقعہ کی سی سی ٹی وی فوٹج بھی سامنے آچکی ہے۔ پولیس کے مطابق واقعے کی تحقیقات کی جارہی ہے۔
دوسری جانب لاہور کے ریس کورس میں پیرا شوٹ کاجمپنگ جھولا گرگیا جس کے باعث 3 بچے زخمی ہوگئے۔ جنہیں فوری طور پر اسپتال منتقل کیا گیا۔
جھولا گرنے کے بعد والدین کی چیخ وپکار پر انتظامیہ نے فوری امدادی کارروائی کرتے ہوئے زخمی بچوں کو جھولے کے نیچے سے نکالا اور طبی امداد فراہم کی، بچوں کی حالت خطرے سے باہر ہے، انہیں معمولی چوٹیں آئیں۔
