شائقین کرکٹ کا انتظار ختم ہوا۔ پی سی بی نے پاکستان سپرلیگ سیون کے ٹکٹوں کی آن لائن فروخت شروع کرنے کا اعلان کردیا۔ پی ایس ایل سیون کے ٹکٹوں کی فروخت آج سہ پہر 3 بجے شروع ہوگی۔شائقین پی سی بی کی مقرر کردہ نجی ٹکٹنگ کمپنی کی ویب سائٹ سے اپنے من پسند میچ کا ٹکٹ خرید سکتے ہیں۔
مداحوں کی سہولت کے لئے پی سی بی نے پہلی مرتبہ ایسی پیشکش متعارف کروائی ہے جس کے تحت 17جنوری تک بک کی جانے والی فرسٹ کلاس اور جنرل اسٹینڈز کی ٹکٹوں پر خصوصی رعائیت دی جائے گی۔ان میں پلے آف یا فائنل کے ٹکٹ شامل نہیں ہوں گے۔شہری ایک شناختی کارڈ پر زیادہ سے زیادہ 6 ٹکٹ خرید سکتے ہیں۔
ٹکٹ خریدتے وقت شائقین کو درست کوویڈ 19 ویکسینیشن سرٹیفیکٹ دکھانا لازمی ہوگا جبکہ ا پنا شناختی کارڈ نمبر اور فون نمبر دینا بھی لازمی ہوگا۔این سی او سی کے فیصلے کے مطابق بارہ سال سے زائد عمر کے تمام افراد کو اسٹیڈیم میں داخلے کے لیے کوویڈ 19 کی مکمل ویکسینیشن کا درست سرٹیفیکٹ دکھانا لازمی ہوگا۔
27 جنوری سے شروع ہونے والے ایونٹ کا پہلا مرحلہ نیشنل اسٹیڈیم کراچی میں کھیلا جائے گا جبکہ دوسرا مرحلہ 10 سے 27 فروری تک قذافی اسٹیڈیم لاہور میں کھیلا جائے گا۔27 جنوری کو شیڈول ٹورنامنٹ کے افتتاحی میچ کے لیے جنرل اسٹینڈز کے ٹکٹ کی قیمت پانچ سو روپے مقرر کی گئی ہے۔ اس میچ کے فرسٹ کلاس انکلوژرز کے ٹکٹ کی قیمت 1500 روپے جبکہ پریمیئم انکلوژرز کے ٹکٹ کی قیمت دوہزار روپے اور وی آئی پی انکلوژرز کے ٹکٹ کی قیمت ڈھائی ہزار روپے مقررکی گئی ہے۔
ایونٹ کے چھ ڈبل ہیڈرز میچز کے دنوں میں جنرل اسٹینڈزکے ٹکٹ کی قیمت ایک ہزار، فرسٹ کلاس انکلوژرز کے ٹکٹ کی قیمت دو ہزارجبکہ پریمیئم انکلوژرز کے ٹکٹ کی قیمت ڈھائی ہزار اور وی آئی پی انکلوژرز کے ٹکٹ کی قیمت تین ہزار روپے مقرر کی گئی ہے۔ دیگر میچز کے لئے جنرل انکلوژرز کی ٹکٹ کی قیمت 250 روپے، فرسٹ کلاس انکلوژرز کی قیمت 1250روپے، پریمیئم انکلوژرز کی قیمت 1750روپے اور وی آئی پی انکلوژرز کی قیمت 2000روپے مقرر کی گئی ہے۔
پلے آف میچز کے لیے جنرل اسٹینڈز کے ٹکٹ کی قیمت ایک ہزار روپے، فرسٹ کلاس انکلوژرز کے ٹکٹ کی قیمت دو ہزار روپے، پریمیئم انکلوژرز کے ٹکٹ کی قیمت اڑھائی ہزار روپے اور وی آئی پی انکلوژرز کے ٹکٹ کی قیمت تین ہزار روپے مقرر کی گئی ہے۔
ٹورنامنٹ کے فائنل کے لیے جنرل اسٹینڈز کے ٹکٹ کی قیمت 1500 روپے، فرسٹ کلاس انکلوژرز کے ٹکٹ کی قیمت ڈھائی ہزار روپے، پریمیئم انکلوژرز کے ٹکٹ کی قیمت تین ہزار روپے اور وی آئی پی انکلوژرز کے ٹکٹ کی قیمت چار ہزار روپے مقرر کی گئی ہے۔
قذافی اسٹیڈیم لاہور میں وسیم اکرم اور وقار یونس انکلوژرز کو ہاسپٹیالٹی اسٹینڈز کا درجہ دیا گیا ہے۔ ان اسٹینڈز کے ٹکٹ کی قیمت چار ہزار سے سات ہزار روپے تک مقررہے۔
انکلوژرز:
نیشنل اسٹیڈیم کراچی:
فضل محمود، جاوید میانداد اور حنیف محمد (وی آئی پی انکلوژرز)، عمران خان، قائد اور وسیم اکرم (پریمیئم انکلوژرز)، آصف اقبال، انتخاب عالم، اقبال قاسم، محمد برادرز اور نسیم الغنی (فرسٹ کلاس انکلوژرز)، ماجد خان، وقاص حسن، وسیم باری اور ظہیر عباس (جنرل اسٹینڈز)
قذافی اسٹیڈیم لاہور:
فضل محمود، عمران خان (وی آئی پی انکلوژرز)، راجاز اور سعید انور (پریمیئم انکلوژرز)، عبد القادر، عبدالحفیظ کاردار، جاوید میانداد اور سرفراز نواز (فرسٹ کلاس انکلوژرز)، حنیف محمد، امتیاز احمد، انضمام الحق، نذر ز، قائد، ظہیر عباس، سعید احمد اور ماجد خان (جنرل انکلوژرز)۔
