رواں سال حج کی سعادت حاصل کرنے والے پاکستانیوں کی وطن واپسی شروع ہوگئی ہے۔ پہلی پرواز حجاج کرام کو لے کر اسلام آباد پہنچ گئی۔ دو پروازیں آج لاہور اور کراچی بھی پہنچیں گی۔
قومی ائیرلائن (پی آئی اے) سے وطن واپس آنے والی تمام پروازیں سعودی عرب میں جدہ ائیرپورٹ سے آپریٹ ہورہی ہیں۔ پہلے روز چار پروازوں سے 693 حجاج کرام وطن واپس پہنچ رہے ہیں۔
پہلی پرواز پی کے 762 آج الصبح اسلام آباد پہنچ گئی جبکہ پی کے 760 آج سہ پہر 3 بج کر 20 منٹ پر لاہور جبکہ پی کے 832 آج سہ پہر 3 بج کر 35 منٹ پر کراچی ائیر پورٹ پر لینڈ کرے گی۔ پی کے 740 پرواز آج شام 6 بج کر 35 منٹ پر پشاور پہنچے گی۔
ترجمان پی آئی اے نے کہا ہے کہ جدہ سے حج فلائٹ آپریشن 20 جولائی تک جاری رہے گا، حجاج کرام کی مکہ سے مدینہ روانگی کا آغاز 5 جولائی سے ہوگا۔ 38 ہزار حجاج کرام کو مدینہ منورہ بھجوایا جائے گا۔ مدینہ منورہ سے آخری حج پرواز 2 اگست کو وطن واپس پہنچے گی۔
ترجمان پی آئی اے کا کہنا ہے کہ پوری کوشش کی جارہی ہے کہ بعد از حج پروازوں کی بروقت روانگی کا تناسب 90 فیصد سے زائد رکھا جائے گا۔
پی آئی اے نے جدہ حج ٹرمینل پر حجاج کرام کی وطن واپس روانگی کے لئے خصوصی انتظامات کئے ہیں۔ پی آئی اے کی خصوصی حج ٹیمیں جدہ و مدینہ ائر پورٹس پر حجاج کی رہنمائی کے لئے موجود ہے۔ پاکستانی ائر پورٹس پر حجاج کرام کے پرتپاک استقبال کے بھی اقدامات مکمل کرلئے گئے ہیں۔
