-
-
قومی ایئر لائن (پی آئی اے) کے حج آپریشن کا پہلا مرحلہ مکمل ہوگیا۔ پی آئی اے کی مجموعی طور پر 268 پروازوں کے ذریعے 61 ہزار 467 حجاج کرام کو سعودی عرب پہنچایا گیا۔ کراچی سے 13 ہزار 248 حاجی حجاج مقدس پہنچے۔
مختلف پروازوں کے ذریعے سے تقریباً 41 ہزار سرکاری حجاج، 19 ہزار پرائیوٹ حجاج اور 60 خدام مدینہ منورہ اور جدہ پہنچے ہیں۔ پی آئی اے کا قبل از حج آپریشن 21 مئی سے شروع ہوا تھا جو 22 جون تک جاری رہا۔ حج آپریشن کی آخری فلائٹ گزشتہ شب کراچی سے جدہ روانہ ہوئی۔
پی آئی اے کے قبل از حج آپریشن میں پروازیں کراچی، اسلام آباد، لاہور ملتان، فیصل آباد، سیالکوٹ اور پشاور سے براہ راست روانہ ہوئیں۔ سکھر، رحیم یار خان اور کوئٹہ سے حجاج نے براستہ کراچی، جدہ کا سفر کیا۔
پاکستان کے سب سے بڑے شہر کراچی سے مجموعی طور پر 83 فلائٹ کے ذریعے 13 ہزار 248 حاجی سعودی عرب پہنچے۔ سب سے زیادہ حجاج کرام وفاقی دارلحکومت اسلام آباد سے روانہ ہوئے۔ اسلام آباد سے 48 پروازوں کے ذریعے 16 ہزار 128 حاجیوں کو حجاج مقدس پہنچایا گیا۔
لاہور سے 38 پروازوں کے ذریعے 12 ہزار 699، ملتان سے 10 پروازوں کے ذریعے 3 ہزار 369، فیصل آباد سے 21 پروازوں کے ذریعے 3 ہزار 26 اور سیالکوٹ سے 13 پروازوں کے ذریعے 4 ہزار 552 حجاج کرام سعودی عرب پہنچے۔
کوئٹہ سے 43 پروازوں پر 6 ہزار 128، پشاور سے 3 پروازوں پر 975، سکھر سے 6 پروازوں پر 879 اور رحیم یار خان سے 3 پروازوں پر 463 حاجیوں کو حجاج مقدس پہنچایا گیا۔
پی آئی اے کی حج پروازوں کی بروقت روانگی کا تناسب 94 فیصد رہا جبکہ 268 پروازوں میں سے 249 پروازیں وقت پر یا وقت سے کچھ دیر پہلے ہی روانہ ہوئیں ، پورے حج آپریشن میں صرف 19 پروازیں مختلف وجوہات کی بنا پر تاخیر کا شکار ہوئیں ۔
حج آپریشن میں بروقت روانگی کے اعلی تناسب پر سی ای او پی آئی اے نے متعلقہ ٹیموں کو شاباش دی۔ پی آئی اے کا بعد از حج آپریشن کا آغاز 2 جولائی سے ہوگا جو 2 اگست تک جاری رہے گا۔
