پاکستان پیپلز پارٹی آج سے وفاقی حکومت کے خلاف لانگ مارچ کا اعلان کررہی ہے۔ پیپلز پارٹی کے قافلے چیئرمین بلاول بھٹو کی قیادت میں شہر قائد سے اسلام آباد کی طرف روانہ ہوں گے۔ پی پی کے لانگ مارچ کے پیش نظر کراچی میں متبادل ٹریفک پلان ترتیب دے دیا گیا ہے۔
کراچی ٹریفک پولیس کے مطابق شہر بھر سے شرکاء نمائش چورنگی پر جمع ہوں گے، جو جلوس کی شکل میں روانہ ہوں گے، اس موقع پر گرومندر سے نمائش جانے والی سڑک عوام کے لیے بند ہو گی۔
ٹریفک پولیس کی جانب سے ہدایت کی گئی ہے کہ شہری گرومندر سے سولجر بازار اور جمشید روڈ سے جیل روڈ فلائی اوور کا راستہ اختیار کریں۔ کراچی ٹریفک پولیس کے مطابق سوسائٹی چورنگی سے نمائش تک عام پبلک کو جانے کی اجازت نہیں، شہری سوسائٹی چورنگی سے دائیں جانب کشمیر روڈ کا راستہ اختیار کر سکتے ہیں
یونیورسٹی روڈ سے آنے والے ٹریفک کو جیل چورنگی شہیدِ ملت روڈ کی طرف موڑا جائے گا، جیل چورنگی سے جمشید روڈ آنے والے ٹریفک کو سولجر بازار کی طرف موڑا جائے گا۔ ریگل سے نیو ایم اےجناح روڈ پر کوریڈور 3 تک پبلک کو جانے کی اجازت نہیں ہو گی۔
کراچی ٹریفک پولیس کا یہ بھی کہنا ہے کہ شہری صدر دواخانے سے براستہ لکی اسٹار شارع فیصل کا راستہ اختیار کر سکتے ہیں۔
