وفاقی حکومت کے خلاف پاکستان پیپلز پارٹی کا عوامی مارچ کل شہرقائد سے شروع ہوگا۔ مارچ پاکستان کے مختلف شہروں سے ہوتا ہوا اسلام آباد پہنچے گا۔ پاکستان پیپلزپارٹی کے چیئرمین بلاول بھٹو زرداری کی منظوری کے بعد روٹ پلان بھی جاری کیا جاچکا ہے۔
عوامی مارچ کراچی سے 10 دن میں 23 اضلاع اور 35 مختلف شہروں سے ہوتا ہوا اسلام آباد پہنچے گا۔ پیپلز پارٹی کے جاری کردہ پلان کے مطابق چیئرمین بلاول بھٹو زرداری کی سربراہی میں عوامی مارچ کا آغاز کراچی میں مزار قائد سے اتوار 27 فروری کو صبح دس بجے سے ہوگا۔
عوامی مارچ براستہ ٹھٹہ اور سجاول سے ہوتا ہوا بدین پہنچے کا جہاں پہلے دن کا اختتام ہوگا۔ مارچ دوسرے دن حیدرآباد ۔ ہالا ۔ نواب شاہ سے ہوتا ہوا مورو پر ختم ہوگا۔ یکم مارچ کو عوامی مارچ مورو سے خیرپور شہر پہنچے گا جہاں سکھر میں تیسرے دن کا اختتام ہوگا۔
چیئرمین بلاول بھٹو زرداری کی سربراہی میں 2 مارچ کو لانگ مارچ کا آغاز سکھر سے ہوگا جہاں سے وہ براستہ گھوٹکی رحیم یار خان پہنچے گا۔ 3 مارچ جمعرات کو عوامی مارچ رحیم یار خان سے شروع ہوگا جہاں بہاول پور، لودھراں سے ہوتا ہوا ملتان میں ہونے والے بڑے عوامی اجتماع پر ختم ہوگا۔
4 مارچ جمعہ کو ملتان سے لانگ مارچ براستہ خانیوال، چیچہ وطنی سے ہوتا ہوا ساہیوال پہنچے گا۔ پاکستان پیپلزپارٹی کے چیئرمین بلاول بھٹو زرداری کی سربراہی میں عوامی مارچ اتوار 5 مارچ ہفتے کو ساہیوال سے اوکاڑہ اور پتوکی سے ہوتے ہوئے لاہور میں داخل ہوجائے گا۔
بلاول بھٹو زرداری دوپہر ایک بجے 6 مارچ اتوار کو ناصر باغ لاہور میں لانگ مارچ کے شرکاء سے خطاب کریں گے۔ بلاول بھٹو عوامی مارچ کی قیادت کرتے ہوئے لاہور کے ناصر باغ سے شیرانوالہ باغ گوجرانوالہ پہنچیں گے جہاں عوامی اجتماع سے خطاب ہوگا۔ پیپلزپارٹی کےمطابق عوام کا سمندر 6 مارچ کو وزیرآباد میں اپنے دن کا اختتام کرے گا۔
7 مارچ پیر کو عوامی مارچ کا قافلہ وزیر آباد سے لالہ موسی جائے گا جہاں جہلم اور گوجر خان ہوتا ہوا راولپنڈی لیاقت باغ پر اپنے دن کا اختتام کرے گا۔۔۔ بلاول بھٹو زرداری کی سربراہی میں 8 مارچ پیر کو لانگ مارچ کا آغاز راولپنڈی سے ہوگا اور عوامی قافلہ مختلف گزرگاہوں سے ہوتے ہوئے اسلام آباد پہنچے گا۔
پاکستان پیپلز پارٹی کی نائب صدر اور سینیٹر شیری رحمان کا کہنا ہے کہ عوامی مارچ کا مقصد مہنگائی، بے روزگاری، بدحالی اور ملک کی معاشی تباہی کی وجہ بننے والے عمران خان سے چھٹکارا دلانا ہے اور یہ مارچ پیٹرول، بجلی، گیس کی قیمتوں میں اضافے کے خلاف ہے۔
انکا کہنا ہے کہ عوام اپوزیشن پارٹیزسے مطالبہ کر رہے کہ وہ اس نااہل حکومت سے ان کو چھٹکارا دلائیں، نیا پاکستان بنانے والوں نے مہنگا پاکستان بنا دیا ہے جس میں غریب کو دو وقت کی روٹی میسر نہیں۔
شیری رحمان نے کہا کہ مارچ کا مقصد تباہی سے نجات دلانا اور پاکستان کو اس نااہل حکومت سے بچانا ہے، پاکستان پیپلزپارٹی کا عوامی مارچ پر امن ہوگا۔ انہوں نے مزید کہا کہ ہم پارلیمان، عدلیہ اور پی ٹی وی پر حملوں پر یقین نہیں رکھتے، ہم آئینی اور جمہوری طریقوں سے حکمرانوں کی تبدیلی پر یقین رکھتے ہیں۔
