سندھ حکومت کے خلاف پاکستان کی حکمران جماعت پی ٹی آئی کا سندھ حقوق مارچ کا آغاز ہوگیا ہے۔ پاکستان تحریک انصاف کا قافلہ گھوٹکی روانہ ہوگیا ہے۔
پی ٹی آئی کے 2014 کے آزادی دھرنے میں استعمال ہونے والا کنٹینر بھی گھوٹکی پہنچادیا گیا ہے۔ وفاقی وزیر بحری امور علی زیدی کا کہنا ہے کہ پاکستان پیپلز پارٹی کے مارچ کے جواب میں پی ٹی آئی مارچ کررہی ہے۔
پاکستان تحریک انصاف کا سندھ حقوق مارچ گھوٹکی سے کراچی تک پہنچے گا۔ پی ٹی آئی کی جانب سے مارچ کے روٹ کا اعلان بھی کیا جاچکا ہے۔
سندھ حکومت کے خلاف 26 فروری کو گھوٹکی سے مارچ شروع ہو گا، جو سکھر روانہ ہوگا، 27 فروری کو شکارپور، کشمور اور جیکب آباد پہنچے گا، 28 فروری کو مارچ کی منزل قمبر شہداد کوٹ اور لاڑکانہ ہوگی
پی ٹی آئی کے اعلان کردہ روٹ کے مطابق یکم مارچ کو پی ٹی آئی کا مارچ خیرپور، نوشہروفیروز اور نواب شاہ میں پڑاؤ ڈالے گا، جس کے بعد مارچ کی اگلی منزل 2 مارچ کو سانگھڑ اور میرپورخاص ہوگی۔
اس موقع پر پی ٹی آئی قیادت مختلف مقامات پر عوام سے خطاب بھی کریں گی۔ سندھ حقوق مارچ 3 مارچ کو عمر کوٹ، تھر پارکر اور بدین پہنچے گا۔ اور وہاں رات قیام کے بعد 4 مارچ کو ٹنڈو محمد جام ، ٹنڈو الہٰ یار اور مٹیاری جائے گا۔
مارچ یہاں سے اپنی اگلی منزل حیدرآباد 5 مارچ کو پہنچے گا۔ چھ مارچ کو پی ٹی آئی کا مارچ اختتامی مراحلے میں داخل ہوتے ہوئے جامشورو اور وہاں سے واپس کراچی آئے گا۔
