پاکستان کرکٹ ٹیم کے کامیاب ترین کپتانوں میں شامل سرفرازاحمد سے متعلق اب اسکول میں سبق پڑھایا جائے گا۔ سرفرازاحمد کی سوانح حیات کو چوتھی جماعت کی اردو کی کتاب میں شامل کرلیا گیا ہے۔
نصاب میں شامل ہونے کے بعد مستقبل کے معماروں کو کرکٹ کے میدان پر سرفرازاحمد کے کارنامے اور کامیابیوں سے متعلق پڑھایا جائے گا اور طالب علم سرفرازاحمد سے متعلق مکمل علم حاصل کرسکیں گے۔
سرفرازاحمد سے متعلق سبق چوتھی جماعت کی اردو کی کتاب میں شامل ہونے کی خبر انکی اہلیہ خوش بخت سرفراز نے سوشل میڈیا پر دی اور چوتھی جماعت کی کتاب کی تصاویر بھی شیئر کیں جس میں سرفرازاحمد کی سوانح پر مشتمل سبق شامل ہے۔
Thrilled!
Just by imagining when my kids would read about their father along with friends & teacher!
Can’t be more proud!
Alhamdulliahوَتُعِزُّ مَن تَشَاءُ وَتُذِلُّ مَن تَشَاءُۖ 🌟@SarfarazA_54 pic.twitter.com/70O1fqeeR4
— Khushbakht Sarfaraz (@sarfarazkhush) August 11, 2022
انہوں نے لکھا کہ وہ اس وقت کا تصور کرتے ہی خوش ہو جاتی ہیں کہ جب ان کے اپنے بچے اسکول میں اپنے اساتذہ اور دوستوں کے ساتھ بیٹھ کر اپنے ہی والد کے بارے میں پڑھیں گے، الحمد للہ اس سے زیادہ فخر کا مقام اورکیا ہو سکتا ہے۔
سابق کپتان سرفرازاحمد نے ان سے متعلق مضمون کو نصاب میں شامل ہونے کو اعزاز قرار دیا۔ سوشل میڈیا پیغام میں ہی سرفرازاحمد نے لکھاکہ وہ رول ماڈل کے طور پر بچوں کو متاثر کرنے کی کوشش کرتے ہیں۔
Thank you! This is a big honour for me. As role models we endeavour to inspire children. I would always be there to play my part in these efforts.@SindhGovt1 @sindhBoard🇵🇰 pic.twitter.com/NL4FFNlzQL
— Sarfaraz Ahmed (@SarfarazA_54) August 12, 2022
سرفرازاحمد نے کہا کہ وہ ان کوششوں میں اپنا کردار ادا کرنے کیلئے ہمیشہ حاضر ہیں۔ سرفرازاحمد نے انہیں نصاب میں شامل کرنے پر سندھ حکومت کا شکریہ بھی ادا کیا۔
سرفراز احمد 22 مئی 1987 کو کراچی میں ایک کاروباری گھرانے میں پیدا ہوئے جبکہ ان کے آباؤ اجداد بھارتی ریاست اترپردیش سے ہجرت کرکے پاکستان آئے تھے۔
کرکٹ کے میدانوں پر سرفرازاحمد نے بے پناہ کامیابیاں حاصل کیں۔ سرفرازاحمد کی قیادت میں پاکستان نے 2006 میں انڈر 19 کرکٹ ورلڈکپ جیتا۔ 2017 میں پاکستان نے سرفرازاحمد کی کپتانی میں ہی پہلی مرتبہ چیمپیئنز ٹرافی جیتنے کا اعزاز حاصل کیا تھا۔
