اقوام متحدہ کی تحقیق کے مطابق پاکستان میں 2 کروڑ سے زائد نوجوان شادی کے منتظر ہیں۔ اہلخانہ اور نوجوانوں نے اچھے رشتوں کی تلاش میں موبائل ایپ کا استعمال بھی شروع کردیا ہے۔
جیو نیوز کی رپورٹ کے مطابق پاکستان پر اقوام متحدہ کی رپورٹ میں انکشاف کیا گیا ہے کہ پاکستان میں تقریباً ہر گھر اچھے رشتے کی تلاش میں ہے اور تقریباً ہر گھر میں نوجوان لڑکے اور لڑکیاں رشتہ ازدواج میں منسلک ہونے کے انتظار میں ہیں۔
اقوام متحدہ کی رپورٹ میں بتایا گیا ہے کہ ایک اندازے کے مطابق پاکستان میں مجموعی طور پر 2 کروڑ 20 لاکھ سے زائد نوجوان لڑکے اور لڑکیاں شادی کے منتظر ہیں۔
رپورٹ کے مطابق مناسب رشتے نہ ہونے کی وجہ سے والدین اپنے بچوں کی شادی کزن سے کروا دیتے ہیں اور کزن کے رشتے نہ ہونے کی وجہ سے والدین اب ذات برادری سے باہر رشتے کرنے پر آمادہ ہوتے ہیں لیکن اپنی ذات برادری سے باہر مناسب اور معتبر رشتے نہ ہونے کی وجہ سے ہچکچاتے بھی ہیں۔
اہلخانہ اور نوجوانوں نے رشتوں کی تلاش میں رشتہ کرانے والے مختلف موبائل ایپ کا استعمال بھی شروع کردیا ہے۔ جیو کی رپورٹ کے مطابق مختلف ایپس پر لاکھوں لوگ رجسٹرڈ ہیں جسکا مقصد اچھے رشتے کی تلاش ہے۔
