پاکستان میں رمضان کا مبارک مہینہ 3 اپریل سے شروع ہونے کا امکان ہے۔ جامعہ کراچی کے انسٹی ٹیوٹ آف اسپیس سائنس اینڈ ٹیکنالوجی کے سربراہ پروفیسر جاوید اقبال کے مطابق پاکستان میں یکم رمضان المبارک اتوار 3 اپریل کو ہونے کا امکان ہے۔
پروفیسر جاوید نے کہا کہ رمضان کا چاند جمعہ یکم اپریل کو صبح 11بجکر 30 منٹ پر پیدا ہوگا جب دو اپریل کو سورج غروب ہوگا تو چاند 32 گھنٹے پرانا ہوچکا ہوگا اور اس کی عمر کافی ہوچکی ہوگی تو ہمیں چاند آسانی سے دکھائی دے گا لہذا پہلا روزہ اتوار 3 اپریل کو ہوگا۔
انہوں نے کہا کہ جمعہ کے روز غروب آفتاب چاند کی عمر صرف 8 گھنٹے ہوگی چنانچہ جمعہ کو غروب آفتاب کے وقت چاند نظر آنے کا کوئی امکان نہیں چنانچہ ہفتہ کو پہلا روزہ نہیں ہوگا۔
واضح رہے کہ اس سے قبل محکمہ موسمیات نے بھی اس بات کا قوی امکان ظاہر کیا تھا کہ 2 اپریل یعنی 29 شعبان کو رمضان المبارک کا چاند نطر آجائے گا۔ جبکہ 2 اپریل کو ملک کے بیشتر حصوں میں مطلع صاف کہیں کہیں جزوی طور پر ابر آلود ہوگا۔
