پشاور: وزیراعظم کے مشیر برائے صحت ڈاکٹر فیصل سلطان کا کہنا ہے کہ ہماری اپنی بے احتیاطی کی وجہ سے کورونا کی لہر شدید ہوئی، پاکستان میں ویکسین کی دستیابی 2021 کی پہلی سہ ماہی میں ممکن ہوسکے گی۔
پشاور میں میڈیا سے بات چیت کرتے ہوئے ڈاکٹر فیصل سلطان نے بتایا کہ کورونا ویکسین کے لئے ڈیڑھ سو ملین ڈالر مختص کردیئے ہیں۔ پہلے مرحلے میں ویکسین فرنٹ لائن ورکرز کو دی جائے گی۔
ان کا کہنا تھا کہ کورونا کی وجہ سے ہوم لرننگ اور خود انحصاری کی جانب بڑھ رہے ہیں۔ وزیراعظم کے معاون خصوصی نے بتایا کہ پولیو مہم کورونا ایس او پیز کے تحت چلائی جائے گی جس کے لئے حکومت کے ساتھ ہر شعبہ زندگی کے افراد کو ساتھ دینا چاہیے۔
