سعودی حکومت نے رواں برس فریضہ حج کی ادائیگی کے لیے جانے والے پاکستانی عازمین کا سفری شیڈول جاری کردیا۔ حج آپریشن کا آغاز 21 مئی سے ہوگا۔
میڈیا رپورٹس کے مطابق سعودی حکومت کی جانب سے پاکستان کو بھیجے شیڈول میں پاکستان سےعازمین حج کی پہلی پرواز 21 مئی کو روانہ ہوگی جب کہ آخری پرواز کے لئے 22 جون کی تاریخ مقرر کی گئی ہے۔
مناسک حج کے اختتام پر سعودی عرب سے پاکستان کے لئے پہلی پرواز کی آمد 2 جولائی کو ہوگی اور آخری پرواز 2 اگست کو ہوگی۔ رواں برس پاکستان سے ایک لاکھ 79 ہزار 210 عازمین حج سعودی عرب روانہ ہوں گے۔
سعودی حکومت نے ریگولر اور چارٹرڈفلائٹس آپریٹرز کو سختی سےہدایت کی ہے کہ وہ سعودی قوانین کی پاسداری کو ہر قیمت پر ممکن بنائیں۔
وفاقی وزارت مذہبی امور کے حکام کا کہنا ہے کہ پاکستانی کرنسی کی قدر میں کمی کے باعث حج اخراجات مزید بڑھ سکتے ہیں۔
گزشتہ برس سرکاری کوٹے پر قربانی کے ساتھ فی کس حج اخراجات 8 لاکھ 60 ہزار 177 روپے جبکہ قربانی کے بغیر 8 لاکھ 14 ہزار 807 کا اعلان کیا گیا تھا تاہم حج کی ادائیگی کے بعد حجاج کو کچھ رقم واپس بھی کی گئی تھی۔
