پاکستان میں کرکٹ اسٹیڈیم کی اپ گریڈیشن کیلئے چیئرمین پی سی بی محسن نقوی نے کام تیز کرنے کی ہدایت کردی۔ اسٹیڈیم میں فلڈ لائٹس، اسکور بورڈ اور لائیو اسٹریم اسکرین تبدیل کرنے پر غور کیا گیا۔
پاکستان کرکٹ بورڈ کے چیئرمین محسن نقوی کی زیرصدارت اہم اجلاس ہوا۔ چیف آپریٹنگ آفیسر پی سی بی سلمان نصیر۔ چیف فنانشل آفیسر۔ ڈائریکٹرڈومیسٹک کرکٹ۔ ڈائریکٹر انفراسٹرکچر اور ڈائریکٹر انٹرنیشنل کرکٹ کی اجلاس میں شرکت کی۔
پی سی بی ہیڈ کوارٹر قذافی اسٹیڈیم میں منعقدہ اجلاس میں سٹیڈیمز کی اپ گریڈیشن پلان کا جائزہ لیا گیا۔ چئیرمین پی سی بی محسن نقوی نے قذافی اسٹیڈیم لاہور، نیشنل بینک اسٹیڈیم کراچی اور راولپنڈی اسٹیڈیم کی اپ گریڈیشن کے لئے انٹرنیشنل کنسلٹنٹ کی خدمات جلد لینے کی ہدایت کردی۔
محسن نقوی نے ہدایت کرتے ہوئے کہا کہ تینوں اسٹیڈیمز کی اپ گریڈیشن کے کام میں پہلے ہی تاخیر ہوچکی ہے، اب بلاتاخیر آگے بڑھا جائے۔
چئیرمین پی سی بی محسن نقوی نے 3 رکنی کمیٹی تشکیل دینے کی بھی ہدایت دے دی۔ کمیٹی انفراسٹرکچر۔ ڈومیسٹک کرکٹ اور انٹرنیشنل کرکٹ کے ڈائریکٹرز پر مشتمل ہو گی۔ کمیٹی انٹرنیشنل کنسلٹنٹ کی قواعد و ضوابط کے تحت جلد ہائرنگ کے عمل کو یقینی بنائے گی۔
کمیٹی انٹرنیشنل کنسلٹنٹ کی مشاورت سے تینوں اسٹیڈیمز میں عالمی معیار کی سہولتوں کی فراہمی یقینی بنائے گی، اپ گریڈیشن پلان کے تحت بکسز میں اسٹرکچرل تبدیلیاں کی جائیں گی اور سہولتوں کو بہتر بنایا جائے گا۔
اسٹیڈیمز کے انکلوژرز میں نشتیں لگائی جائیں گی اور شائقین کرکٹ کی سہولت کیلئے ہر نشت کا نمبر ہوگا۔ قذافی سٹیڈیم کے مین گیٹ کے دو اطراف انکلوژرز میں نشتوں کی تعداد میں اضافہ کیا جائے گا۔
چئیرمین پی سی بی محسن نقوی نے اسٹیڈیمز میں اسکور بورڈ اورلائیو اسٹریم کے لئے اسکرین تبدیل کرنے اور اسٹیڈیمز کی فلڈ لائٹس کو تبدیل کرنے کیلئے تخمینہ لگانے کی بھی ہدایت کی۔
