عالمی سطح پر منی لانڈرنگ اور دہشت گردی کی مالی معاونت کی روک تھام کے نگراں ادارے فنانشل ایکشن ٹاسک فورس (ایف اے ٹی ایف) نے پاکستان کو گرے لسٹ میں برقرار رکھنے کا فیصلہ کیا ہے۔ ایف اے ٹی ایف کی 27 میں سے 26 شرائط پوری کرنے کے باوجود بھی پاکستان کا گرے لسٹ میں برقرار رہنا ماہرین کی نظر میں حیران کن ہے۔
ایف اے ٹی ایف کے اعلامیے کے مطابق دہشت گردی کے خلاف قانون ساز ی کی گئی مگر پولیس کی تفتیش میں فقدان کے باعث مجرموں کو عدالتوں سے سزائیں نہیں ہوئیں۔
عالمی نگراں ادارے کے مطابق پاکستان کی جانب سے دہشت گردی کی فنانسنگ روکنے میں خاطر خواہ پیش رفت کی گئی ہے۔ لیکن پاکستان تمام نکات پر عمل درآمد یقینی بنائے۔
دوسری جانب فنانشل ایکشن ٹاسک فورس نے متحدہ عرب امارات کو بھی گرے لسٹ میں شامل کرلیا ہے۔ ایف اے ٹی ایف کے مطابق متحدہ عرب امارات ایف اے ٹی ایف کے ایکشن پلان کو نافذ کرنے کے لیے کام کرے گی۔ ایف اے ٹی ایف نے تسلیم کیا ہے کہ اماراتی حکومت منی لانڈرنگ اور دہشت گردوں کی مالی معاونت روکنے کے لیے اقدامات کر رہی ہے۔
