گورنر سندھ کامران ٹیسوری نے وزیراعلیٰ سندھ سید مراد علی شاہ کی ایڈوائس پر صوبائی اسمبلی کی تحلیل کی سمری پر دستخط کر دیے۔ سندھ اسمبلی اس وقت تحلیل کی گئی ہے جب 9 اگست کو قومی اسمبلی کو قبل از وقت تحلیل کیا گیا تھا۔
قومی اسمبلی کی طرح سندھ اسمبلی بھی مقررہ وقت سے قبل 11اگست کو تحلیل کی گئی جہاں سندھ اسمبلی اپنی پانچ سالہ مدت 12 اگست کو پوری کرنے والی تھی۔ سندھ اسمبلی چار سال 11 ماہ اور 29 دن قائم رہی۔
سندھ کی صوبائی اسمبلی تحلیل کرنے کی سمری پر دستخط کردئیے ہیں pic.twitter.com/okWxJJUEDD
— Kamran Tessori (@KamranTessoriPk) August 11, 2023
سندھ حکومت کی طرف سے جاری کردہ نوٹی فکیشن میں گورنر سندھ کامران ٹیسوری نے کہا کہ جیسا کہ وزیر اعلیٰ کی ایڈوائس اور اسلامی جمہوریہ پاکستان کے آئین کے آرٹیکل 112 کی شق (1) کے تحت مجھے دیے گئے اختیارات کے استعمال اور دیگر دفعات کے تحت میں گورنر سندھ محمد کامران خان ٹیسوری بروز جمعہ، 11 اگست بوقت رات 9 بجے سندھ کی صوبائی اسمبلی کو تحلیل کرتا ہوں۔
سندھ اسمبلی تحلیل ہوتے ہی صوبائی کابینہ بھی ازخود تحلیل ہوگئی ہے جبکہ محکمہ قانون سندھ نے اسمبلی تحلیل ہونے کا نوٹیفکیشن بھی جاری کردیا ہے۔ واضح رہے کہ نگراں وزیر اعلیٰ کے تقرر تک مراد علی شاہ وزیر اعلیٰ سندھ رہیں گے۔
مدت مکمل ہونے سے قبل اسمبلی ٹوٹنے پر 3 دن میں وزیراعلیٰ سندھ مراد علی شاہ اور اپوزیشن لیڈر نے نگران وزیراعلیٰ کیلئے مشاورت کرنی ہے۔
