وزیراعظم شہباز شریف کی پاکستان کا پہلا سیٹلائٹ مشن روانہ ہونے پر سائنسدانوں کو مبارکباد

پاکستان کی جانب سے چاند کی جانب پہلا سیٹلائٹ مشن روانہ کرنے پر قوم اور سائنسدانوں کو مبارکباد پیش کی گئی ہے۔ پاکستان کا پہلا سیٹلائٹ مشن آج چین کے قمری مشن کے ساتھ روانہ ہوا ہے۔

میڈیا رپورٹس کے مطابق وزیراعظم ہاؤس کی جانب سے جاری بیان میں وزیرِ اعظم شہباز شریف نے کہا ہے کہ آئی کیوب قمر سیٹلائٹ خلاء میں پاکستان کا پہلا قدم ہے، جوہری میدان کی طرح یہاں بھی ہمارے سائنسدان اور انجینئرز اپنی صلاحیتیں منوا رہے ہیں۔

ان کا کہنا ہے کہ انسٹیٹیوٹ آف اسپیس ٹیکنالوجی کی کور کمیٹی اورسپارکو سمیت تمام ٹیم کو دل کی گہرائیوں سے خراجِ تحسین پیش کرتا ہوں۔

وزیرِ اعظم شہباز شریف کا کہنا ہے کہ پاک چین دوستی خوشبو کی سرحد سے آگے آج خلاؤں کی سرحد بھی پار کر چکی، 8 ممالک میں پاکستان کو قبول کیا جانا ہمارے سائنسدانوں اور ماہرین کی قابلیت کا اعتراف ہے۔

انہوں نے کہا کہ یہ تکنیکی ترقی کے سفر کا بہت تاریخی لمحہ ہے، اس اہم کامیابی سے پاکستان خلاء کے با مقصد استعمال کے نئے دور میں داخل ہو گیا، یہ کامیابی سیٹلائٹ کمیونیکیشن کے شعبے میں پاکستان کی صلاحیتیں بڑھائے گی۔

وزیرِ اعظم شہباز شریف نے کہا کہ اس کامیابی سے سائنسی تحقیق، اقتصادی ترقی اور قومی سلامتی کے لیے نئے مواقع پیدا ہوں گے، پاکستان کے بیٹوں نے ثابت کیا وہ خلاؤں کی بھی تسخیر کی صلاحیت، جذبہ، مہارت رکھتے ہیں۔

ان کا مزید کہنا ہے کہ اللّٰہ تعالیٰ نے چاہا تو 28 مئی 1998ء کی طرح خلاؤں اور معاشی اوجِ کمال کو بھی پہنچیں گے، پاکستان کی سائنس و ٹیکنالوجی، جدید علوم اور ہنرمندی میں ترقی وقت اور ملک کی ضرورت ہے۔

وزیرِ اعظم شہباز شریف نے یہ بھی کہا ہے کہ پوری کوشش اور توجہ ہے کہ اپنی نوجوان نسل کو جدید علوم و فنون، سائنس و ٹیکنالوجی میں آگے لے کر جائیں، کوشش ہے کہ پاکستان ایجادات کی دنیا میں بھی سب سے آگے ہو۔

Spread the love
جواب دیں
Related Posts