پاکستان تحریک انصاف کے اسلام آباد میں لانگ مارچ کے سلسلے میں کراچی میں نمائش چورنگی کے مقام پر احتجاج اور دھرنا دیا گیا۔ احتجاج کے دوران مشتعل مظاہرین کی جانب سے پولیس پر پتھراؤ ، جلاؤ گھیراؤ بھی کیا گیا۔
نمائش چورنگی اور اطراف کا علاقہ گھنٹوں تک میدان جنگ رہا، پرتشدد مظاہرے کے نتیجہ میں پاکستان تحریک انصاف کراچی کی قیادت کے خلاف انسداد دہشتگردی کا مقدمہ درج کرلیا گیا۔
مقدمہ سولجر بازار تھانے میں درج کیا گیا ہے۔ پولیس کا کہنا ہےکہ سرکار کی مدعیت میں درج مقدمے میں انسداد دہشتگردی اور جلاؤ گھیراؤ سمیت دیگر دفعات شامل کی گئی ہیں۔
پولیس کے مطابق مقدمے میں علی زیدی، فردوس شمیم نقوی، بلال غفار، خرم شیر زمان، ارسلان تاج، محمد علی جی جی، جمال صدیقی، محسن بٹ اور اشرف علی نامزد ہیں۔
پی ٹی آئی کی کراچی قیادت کے علاوہ دیگر کارکنان کو بھی مقدمہ میں نامزد کیا گیا ہے، مجموعی طور پر 100 سے زائد کارکنان کے خلاف مقدمہ درج کیا گیا ہے۔
مقدمات کے متن کے مطابق گزشتہ روز پی ٹی آئی کراچی کے لوگ مختلف مقامات سے نمائش چورنگی پر جمع ہو رہے تھے، دھرنے میں شرکاء کی تعداد تقریباً 700 کے قریب تھی، مقدمہ میں نامزد ارکان نے دہشتگردی پھیلاتے ہوئے روڈ بلاک کیا گیا۔
حکومت کے خلاف نعرے بازی اورسرکاری املاک کو نقصان پہنچایا گیا، پارٹی کارکنان کی جناب سے پولیس پر جان سے مارنے کی نیت سے فائرنگ بھی کی گئی۔ پولیس موبائل اور پولیس وین کو آگ لگانے سمیت دیگر گاڑیوں کو بھی نقصان پہنچایا گیا۔
