عمران خان کی وزیراعظم کے عہدے سے برطرفی اور پی ٹی آئی حکومت کے ختم ہونے کے بعد پاکستان کرکٹ بورڈ میں بھی تبدیلیوں کا امکان ظاہر کیا جارہا ہے۔ ڈپارٹمنٹ کرکٹ کی بحالی کیلئے بھی آوازیں بلند ہونا شروع ہوگئی ہیں۔
صوبائی وزیراطلاعات ناصرحسین شاہ نے بھی ادارہ جاتی کرکٹ کی بحالی کیلئے اپنی آواز ملادی۔ ناصرحسین شاہ نے نئے وزیراعظم میاں شہباز شریف سے ڈپارٹمنٹ کرکٹ کو بحال کرنے کی درخواست کردی۔
سماجی رابطے کی ویب سائٹ ٹوئیٹر پر ناصرحسین شاہ نے شہباز شریف کو مخاطب کرتے ہوئے لکھا کہ وزیراعظم شہباز شریفک بطور پیٹرن ان چیف پی سی بی کی حیثیت سے ڈپارٹمنٹ کرکٹ کو فوری طور پر بحال کریں۔
عمران خان کے ظالمانہ فیصلے کی وجہ سے پاکستان کے ہزاروں نوجوان کرکٹرز بے روزگاری کے باعث کرکٹ چھوڑ چکے ہیں۔
واضح رہے عمران خان ڈپارٹمنٹ کرکٹ کے ہمیشہ مخالف رہے اور ہمیشہ ریجنل کرکٹ کو فروغ دینے کی بات کی۔ اقتدار میں آنے کے بعد عمران خان کی خواہش کے مطابق نہ صرف کرکٹ بلکہ دیگر کھیلوں سے بھی ڈپارٹمنٹ کی ٹیمیں ختم کردی گئی تھیں۔
عمران خان کی نامزدگی پر پہلے احسان مانی اور پھر رمیزراجہ چیئرمین پی سی بی منتخب ہوئے اور دونوں نے ہی سابق وزیراعظم کی خواہش کے مطابق ہی ریجنل کرکٹ کے ویژن کو آگے بڑھایا۔
لیکن اب حکومتی تبدیلی کے بعد ایک بار پھر ڈپارٹمنٹ کرکٹ کی بحالی کیلئے آوازیں اٹھ رہی ہیں، سابق کھلاڑیوں اور مختلف ریجنز کے سربراہان نے ادارہ جاتی کرکٹ کی بحالی کیلئے کوششیں شروع کردی ہیں۔
