پاکستان مسلم لیگ ن کے رہنماؤں محمدزبیر، نہال ہاشمی، کھیل داس کوہستانی اور بشیرمیمن نے کراچی میں پریس کانفرنس میں نواز شریف کی وطن واپسی پر استقبال کی تیاریوں اور سندھ سے روانہ ہونے والے قافلوں سے متعلق تفصیلات سے آگاہ کیا۔
سابق گورنر سندھ اور پی ایم ایل این کے سینیئر لیڈر محمدزبیر نے میڈیا کے نمائندوں سے بات کرتے ہوئے کہا کہ آج کی سب سے اچھی خبر ہے کہ میاں محمد نواز شریف کو ضمانت ملے گی۔
ہم نے پہلے کہا تھا میاں صاحب جب پاکستان قدم رکھیں گے تو وہ آزاد پاکستانی ہوں گے، نواز شریف وطن واپسی کیلئے ہفتہ کو دبئی سے اڑان بھریں گے۔
محمدزبیر کا کہنا تھا کہ نواز شریف کے استقبال کیلئے سندھ سے قافلہ کل سٹی ریلوے اسٹیشن سے روانہ ہوگا۔ قافلہ کینٹ اسٹیشن، ڈرگ روڈ اسٹیشن اور لانڈھی اسٹیشن پر رکے گا اور لانڈھی اسٹیشن پر پریس کانفرنس بھی کی جائے گی۔ قافلے کی دوسری ٹرین حیدرآباد سے روانہ ہوگی۔ روہڑی اسٹیشن پر جلسہ بھی ہوگا۔
محمدزبیر محمدزبیر نے انکشاف کیا کہ ہمارے کارکن ناراض ہیں زیادہ لوگوں کو نہیں لے جاسکتے۔ ہم سب کو بتانے کی کوشش کررہے ہیں کہ محدود لوگوں کو لے جاسکتے ہیں۔ میاں نواز شریف کی محبت ہے لوگ بہت بڑی تعداد میں جانا چاہتے ہیں۔
بشیر میمن کا اس موقع پر کہنا تھا کہ ریلوے کی ایک گنجائش ہے اس کو مد نظر رکھتے ہوئے لوگوں کو لیکر جا رہے ہیں ہم نے سوچا بھی نہیں تھا کہ اتنے زیادہ کارکن جانا چاہتے ہیں ریلوے کے پاس ایک نظام ہے ریلوے والے کہتے ہیں ہم دو ہی اسپیشل ٹرین دے سکتے ہیں۔ ہم نے ٹرین کی چھتوں پر بیٹھنے سے سختی سے منع کیا ہے، ڈسپلن کے ساتھ جائیں گے۔
نہال ہاشمی نے پریس کانفرنس کرتے ہوئے کہا کہ جو لوگ کہتے تھے ن لیگ کراچی اور سندھ میں کہیں نظر نہیں آتی آج انکی چیخیں نکل رہی ہیں۔ آج سندھ کہہ رہا ہے کہ صوبہ سندھ نواز شریف کا ہے۔
کھیل داس کوہستانی نے پریس کانفرنس میں چیئرمین پیپلز پارٹی بلاول بھٹو کو مخاطب کرتے ہوئے کہا کہ بلاول بھٹو دیکھ لیں ہمارے کتنے کارکن ہیں۔
