ملک بھر میں بڑھتی ہوئی مہنگائی سے جرائم میں بھی اضافہ ہونے لگا۔ روز مرہ کھانے پینے کی اشیاء قوت سے خرید سے باہر ہونے پر چوری کی وارداتیں رپورٹ ہونے لگیں۔ کراچی میں پرچون کی دکان کے باہر سے گھی کی بالٹیاں چوری ہوگئیں۔
کراچی کے علاقے لائنز ایریا میں ایک شہری نے پرچون کی دکان کے باہر سے گھی کی بالٹیاں چوری کیں۔ چوری کی سی سی ٹی وی فوٹج سوشل میڈیا پر وائرل ہوگئی ہے۔
فوٹج میں دیکھا جاسکتا ہے کہ شلوار قمیض میں ملبوس ایک شخص اشیاء خوردونوش کی دکان کے باہر فٹ پاتھ پر رکھی ہوئی گھی کی بالٹیوں کے قریب آکر رکتا ہے اور تھوڑی دیر بعد 2 گھی کی بالٹیاں لے کر فوری فرار ہوجاتا ہے۔
چند سیکنڈز بعد یہ شخص دوبارہ آتا ہے اور دکاندار کا دھیان بٹتے ہی مزید گھی کی بالٹیاں لے جاتا ہے۔ ایس ایچ او تھانہ بریگیڈ کے مطابق دکاندار نے واقعہ کی کوئی رپورٹ درج نہیں کرائی ہے۔
شہریوں کا کہنا ہے کہ ملک بھر میں بڑھتی مہنگائی کے باعث جرائم میں اضافہ ہورہا ہے۔ اسٹریٹ کرائم، بینکوں سے رقم لے کر آنے والوں لوگوں سے لوٹ مار کی وارتیں عام ہورہی ہیں۔ جبکہ گھر میں ڈکیتی کی وارداتوں میں بھی اضافہ ہوا ہے۔
