معروف عالم دین مولانا طارق جمیل وزیراعظم پاکستان عمران خان کی کامیابی کے لئے دعا گو ہیں۔ پی ٹی آئی کے صوبائی وزیر سندھ سعید آفریدی کا دعویٰ ہے کہ مولانا طارق جمیل نے وزیراعظم کی کامیابی کے لئے دعائیں کی ہیں۔
سندھ اسمبلی میں پاکستان تحریک انصاف کے اپوزیشن لیڈر حلیم عادل شیخ اور ایم پی اے سعید آفریدی نے کراچی میں مولانا طارق جمیل سے ملاقات کی۔
ملاقات کے بعد ایم پی اے سعید آفریدی نے ملاقات کی تصاویر شیئر کرتے ہوئے ایک ٹوئٹ کی اور بتایا کہ آج مولانا طارق جمیل سے کراچی میں ملاقات کا شرف حاصل ہوا جس میں مولانا طارق جمیل نے وزیراعظم کی کامیابی کے لیے ڈھیروں دعائیں دیں۔
سعید آفریدی نے لکھا کہ دراصل طارق جمیل صاحب جیسے عالم دین ہی ہمارے ملک کا اصل اثاثہ ہیں۔ سعیدآفریدی کے ٹوئیٹرپیغام کو پاکستان تحریک انصاف سمیت عمران خان کے چاہنے والوں کی جانب سے سوشل میڈیا پر خوب آگے بڑھایا جارہا ہے۔
واضح رہے وزیراعظم عمران خان ان دنوں مشکلات سے دوچار ہیں۔ اپوزیشن جماعتوں کی جانب سے عمران خان کے خلاف تحریک عدم اعتماد جمع کروائی گئی ہے۔ حکومت کی اتحادی جماعتوں کی جانب سے بھی واضح حمایت کا اعلان نہ کرنے کے باوجود عمران خان کا بحیثیت وزیراعظم مستقبل پر سوالیہ نشان لگ گیا ہے۔
مولانا طارق جمیل ماضی میں بھی عمران خان کو پاکستان کے روشن مستقبل کے لئے امید کی کرن قرار دے چکے ہیں۔ ماضی میں بھی مولانا طارق جمیل نے عمران خان کی کامیابی کے لئے دعا کی تھی۔
