ملیرایکسپریس وے کے روڈ کی تعمیر کے باعث کراچی کے شہریوں کو دو روز تک پانی کی عدم فراہمی کا سامنا کرنا پڑے گا۔ کل سے شہرقائد کے متعدد علاقوں میں پانی فراہمی بند رہے گی۔
کراچی واٹر اینڈ سیوریج بورڈ کے چیف انجینیئر نے شہریوں کو پانی کا ذخیرہ کرنے اور دو روز تک پانی احتیاط سے استعمال کرنے کا مشورہ دیا ہے۔
تفصیلات کے مطابق ملیر ایکسپریس وے کی جانب سے ملیر ندی پر روڈ کے مرمتی کام کی وجہ سے نیو پمپ ہاؤس گھارو پمپنگ اسٹیشن سے پانی کی فراہمی معطل کی جائے گی۔
ملیر ندی مانسہرہ کالونی کے اطراف میں 33 اور 18 ڈایا پی آر سی پائپ کے مرمتی کام کی وجہ سے 6 جون بروز پیر کی صبح 8 بجے سے اگلے 48 گھنٹوں تک روڈ پر مرمتی کام جاری رہے گا۔
مرمتی کام کی وجہ سے بن قاسم ٹاؤن، لانڈھی ٹاؤن، شاہ فیصل ٹاؤن، پی ایف فیصل، پاکستان نیوی کارساز اور اسٹاف کالونی کارساز وارٹربورڈ میں گھارو پمپنگ اسٹیشن سے پانی بند رہے گا۔
ایم ڈی واٹر بورڈ کے مطابق بدھ کی صبح 8 بجے تک مرمتی کام مکمل ہوتے ہی گھارو پمپنگ اسٹیشن سے پانی کی فراہمی فوری طور پر بحال کردی جائے گی۔ دو روز تک شہری پانی کے استعمال میں احتیاط کریں۔
