ملک بھر میں مجموعی طور پر ساتویں اور پہلی مرتبہ ڈیجیٹل طریقے سے ہونے والی مردم شماری کا عمل مکمل ہوگیا۔ کراچی کی آبادی 1 کروڑ 90 لاکھ کے قریب رہی۔
میڈیا رپورٹس کے مطابق حکومت کی جانب سے مردم شماری کے عمل میں مزید توسیع نہ کرنے کا فیصلہ کیا گیا ہے اور ملک بھر میں مردم شماری کا عمل رات 12 بجتے ہی ختم ہوگیا۔
ادارہ شماریات کے مطابق پاکستان کے سب سے بڑے شہر کراچی میں کی آبادی میں گزشتہ 3 دنوں میں 2 لاکھ کا اضافہ ہوا اور کراچی کی آبادی 1 کروڑ 90 لاکھ کے قریب رہی۔ سندھ کی آبادی 5 کروڑ 74 لاکھ سے زائد افراد پر مشتمل ہے۔
حیدر آباد کی آبادی 1 کروڑ 22 لاکھ سے زائد بتائی جا رہی ہے۔ لاڑکانہ ڈویژن کی آبادی 81 لاکھ 24 ہزار سے زائد شہریوں پر مشتمل ہے۔
ادارہ شماریات کے مطابق میر پورخاص ڈویژن کی آبادی 51 لاکھ 27 ہزار سے زائد ہے۔ شہید بینظیر آباد ڈویژن کی آبادی 62 لاکھ سے زائد نفوس پر مشتمل ہے۔ ادارہ شماریات کے مطابق سکھر ڈویژن کی آبادی 66 لاکھ 76 ہزار سے تجاوز کر گئی ہے۔
ملک بھر میں ڈیجیٹل مردم شماری کا عمل ڈھائی ماہ جاری رہا اور اس دوران مردم شماری کے عمل میں 5 مرتبہ توسیع کی گئی۔ مردم شماری کا آغاز یکم مارچ کو کیا گیا تھا۔
