پاکستان اور انگلینڈ کے درمیان ٹی ٹوئنٹی سیریز کا آغاز آج سے ہورہا ہے۔ میچ کے آغاز سے قبل ملکہ برطانیہ ایلزبتھم دوم کو خراج عقیدت پیش کیا جائے گا۔
نیشنل اسٹیڈیم کراچی میں پاکستان اور انگلینڈ کی ٹیمیں آج سات ٹی ٹوئنٹی میچز کی سیریز کے پہلے میچ میں مدمقابل ہوں گی۔ یہ پہلا موقع ہوگا جب انگلینڈ کی ٹیم 2005 کے بعد پہلی مرتبہ پاکستانی سرزمین پر ان ایکشن ہوگی۔
پاکستان اور انگلینڈ کے میچ کے آغاز سے قبل ملکہ برطانیہ کو خراج عقیدت پیش کیا جائے گا۔ نیشنل اسٹیڈیم میں ایک منٹ کی خاموشی اختیار کی جائے گی۔ انگلینڈ کی ٹیم میچ میں سیاہ پٹیاں بازوؤں پر باندھ کر میدان پر اترے گی۔
میچ کے آغاز سے قبل پاکستان کرکٹ ٹیم کے کھلاڑیوں کی جانب سے بھی ایک منٹ کی خاموشی اختیار کی جائے گی۔ پاکستان کی جانب سے سیلاب کی تباہ کاریوں اور جاں بحق افراد کیلئے خاموشی اختیار کی جائے گی۔
ملکہ برطانیہ کی آخری رسومات گزشتہ روز ادا کی گئی تھیں۔ ملکہ برطانیہ کی آخری رسومات میں وزیراعظم شہباز شریف سمیت دنیا بھر کے سربراہان مملکت سمیت 500 کے قریب سرکاری شخصیات نے شرکت کی۔
انگلینڈ کرکٹ ٹیم نے گزشتہ روز پریکٹس سیشن کے دوران بھی ملکہ برطانیہ کو خراج عقیدت پیش کیا۔ اس دوران انگلینڈ کرکٹ ٹیم کے کھلاڑیوں کی جانب سے ملکہ برطانیہ کیلئے دعا بھی کی گئی تھی۔
