سندھ حکومت نے معروف کامیڈین اداکار عمر شریف کے علاج کے لیے رقم جاری کر دی۔
محکمہ خزانہ سندھ نے کامیڈین عمر شریف کے علاج کے لیے چار کروڑ روپے کی رقم جاری کرنے کا نوٹیفکیشن جاری کر دیا۔ مزید یہ کہ سندھ حکومت نے عمر شریف ایئر ایمبولینس کا بندوبست بھی کردیا ہے۔
نجی ٹی وی چینل دنیا نیوز کی رپورٹ کے مطابق وفاقی حکومت نے بھی کامیڈین اداکار کے علاج کے لیے بھرپور مدد کا اعلان کیا تھا، گزشتہ روز وزیراعظم عمران خان کے معاون خصوصی شہباز گل نے کہا تھا کہ عمر شریف کا علاج امریکا میں کروانے کے لیے ویزے کی درخواست سفارت خانے میں جمع کروا دی ہے۔
تاہم عمر شریف کی اہلیہ زرین عمر نے فیس بک کے ذریعے مداحوں کے لیے ایک اچھی خبر شیئر کی ہے کہ ڈاکٹرز کے مطابق عمر شریف کی طبیعت میں بہتری آرہی ہے۔ وہ اچھی کارکردگی کا مظاہرہ کررہے ہیں اور وہ ایئر ایمبولینس کے ذریعے سفر کرنے کے قابل ہیں۔
اس کے علاوہ انہوں نے ویزا کے جلد عمل کے لیے وفاقی حکومت اور ایئر ایمبولینس کے اخراجات برداشت کرنے پر سندھ حکومت، بلاول بھٹو زرداری، مرتضیٰ وہاب اور سید مراد علی شاہ کا شکریہ ادا کیا۔
