پاک سرزمین پارٹی کے رہنما مصطفی کمال نے پاکستان تحریک انصاف حکومت کو سپورٹ کرنے کا اعلان کرتے ہوئے کہا ہے کہ ہماری تمام اخلاقی سپورٹ پی ٹی آئی کی موجودہ حکومت کے ساتھ ہے۔
مصطفی کمال نے سوشل میڈیا پر جاری اپنے ویڈیو پیغام میں کہا کہ اس وقت تمام پاکستانیوں کو علم ہے کہ ملک میں حکومت گرانے اور حکومت بچانے کی گھناؤنی گیم چل رہی ہے۔
مصطفی کمال نے کہا کہ اگر سندھ کی بات کی جائے تو ایک جماعت کیو ایم جو گزشتہ 40 سالوں سے پیپلز پارٹی سے سندھ کے حقوق لینے کی علمبردار تھی آج انہی کے ساتھ جا بیٹھی ہے اور حکومت گرانے کی سازش کا حصہ بنی ہوئی ہے۔
ان کا کہنا تھا کہ یہ عمران خان صاحب کی آنکھیں کھولنے کے لئے کافی ہے کہ آج ایم کیو ایم کا موجودہ وزیر جو کہ کیبنٹ منسٹر بھی ہے وہ آصف علی زرداری ، مولانا فضل ارحمان سے مل رہا ہے اور حکومت کو گرانے کے لئے منصوبے بنائے جا رہے ہیں۔
پاک سرزمین پارٹی کے سربراہ نے کہا کہ یہ وہی لوگ ہیں جن کو وزیراعظم صاحب نفیس کہتے تھے، جن کے میئر کے بارے میں ان کا کہنا تھا کہ وہ کرپٹ نہیں ہے، اور یہ لوگ حکومت کو گرانے کے منصوبوں میں حصہ دار بن رہے ہیں۔
مصطفی کمال کے مطابق وزیراعظم کے لوگوں نے کسی کے ساتھ کچھ خاص رویہ نہیں رکھا ، لیکن پورے پاکستان میں ان کی غیر تسلی بخش کارکردگی کے باوجود اگر موجودہ حکومت کا نعم البدل ایم کیو ایم اور پیپلز پارٹی ہی ہوں گے تو اخلاقی طور پر ہم وزیراعظم عمران خان کے ساتھ کھڑے ہیں کیونکہ آج یہ جماعتیں اپنی کرپشن بچانے کے لئے ایک دوسرے کے ساتھ تعاون کے لئے رضامند ہوئی ہیں۔
