ملکہ کوہسار مری اور گلیات میں گزشتہ چند دنوں سے شدید برفباری کا سلسلہ جاری ہے جس کے باعث سیاحوں کی بڑی تعداد برفباری اور موسم سے لطف اندوز ہونے مری پہنچ گئی۔ شدید برفباری کے نتیجہ میں آمدو رفت معطل ہوگئی اورسخت سردی میں کئی افراد سڑکوں پر ہی رات گزارنے پر مجبور ہوگئے۔
ہنگامی حالات سے نمٹنے کیلئے وفاقی وزیرداخلہ شیخ رشید نے مری جانے والے تمام راستے بند کردئے ہیں اور اتوار کی رات 9بجے تک مری آنے پر پابندی عائد کردی ہے۔ وزیرداخلہ کے مطابق گزشتہ بارہ گھنٹوں ٹریفک بحال نہیں ہوسکی ہے۔شدید سردی اور برفباری کے باعث سڑکوں پر گاڑیوں میں موجود لوگوں میں سے 16سے 19 کے درمیان اموات ہوچکی ہیں۔ مری میں رہائش اور خوراک کی بھی قلت ہوگئی ہے جسکے باعث شیخ رشید احمد نے مری کے آس پاس کے لوگوں سے سیاحوں کو خوراک اور کمبل وغیرہ فراہم کرنے کی اپیل بھی کی ہے۔
وفاقی وزیرداخلہ کا کہنا ہے کہ مری میں پھنسے سیاحوں کو نکالنے کے لئے سول آرمڈ فورسز کو طلب کرلیا گیا ہے جس میں پاک فوج، رینجرز اور ایف سی شامل ہیں۔محکمہ موسمیات نے مری، گلیات اورآزاد کشمیر کیلئے آج شدید موسمی صورت حال کا انتباہ جاری کیا ہے۔
