محکمہ موسمیات کی 24 جولائی سے کراچی میں بارشوں کی پیشگوئی

محکمہ موسمیات نے شہرقائد میں مون سون کا چوتھا اسپیل ہفتے یا اتوار سے شروع ہونے کی پیشگوئی کردی۔ مون سون کے چوتھے اسپیل سے بھی کراچی میں موسلا دھار بارشیں ہوسکتی ہیں۔

محکمہ موسمیات کے مطابق کراچی میں 24 سے 26 جولائی تک تیز بارشوں کا امکان ہے۔ جسکے باعث ایک بار پھر شہر کے نشیبی علاقوں میں سیلابی صورتحال پیدا ہوسکتی ہے۔

چیف میٹرولوجسٹ سردار سرفراز کا کہنا ہے کہ 22 جولائی کی رات کو مون سون کا سسٹم اندھ میں داخل ہوگا، اس دورن سندھ کے مشرقی اضلاع دادو، قمبرشہداد کوٹ میں بارش ہوگی۔

سردار سرفراز کا کہنا ہے کہ کراچی میں 24 جولائی سے بارش کا آغاز متوقع ہے جبکہ 25 جولائی کو کراچی میں تیز بارش کا امکان ہے۔ محکمہ موسمیات کے مطابق 26 جولائی تک بارش کا سلسلہ جاری رہ سکتا ہے۔

محکمہ موسمیات کے مطابق اس سسٹم کا زیادہ تر حصہ زمین پر ہونے کے باعث اس کی شدت زیادہ ہے، خلیجِ بنگال سے نم ہوائیں مون سون سسٹم کو مضبوط کر رہی ہیں۔ چیف میٹرولوجسٹ کا یہ بھی کہنا ہے کہ بھارت کے بعد اس سسٹم کو بحیرۂ عرب سے نمی کی سپورٹ رہے گی۔

admin