محکمہ جنگلی حیات نے کاروائی کرتے ہوئے 2 لیپرڈ کیٹ ( چیتا بلی ) برآمد کرلیں۔ دونوں بلیوں کو اسلام آباد میں مارگلہ کی پہاڑیوں پر چھوڑ دیا جائے گا۔
محکمہ جنگلی حیات کے چیف جاوید مہر کے مطابق سوشل میڈیا پر دو لیپرڈ کیٹ کی فروخت کا اشتہار دیا گیا تھا جسے دیکھنے کےبعد ملزمان کو پکڑنے کیلئے جامعہ پلان بنایا گیا۔
محکمہ جنگلی حیات کے عملہ نے خریدار بن کر لیپرڈ کیٹ فروخت کرنے والوں سے رابطہ کیا اور پھر سودا طے ہونے کے بعد عملہ بلیوں کو خریدنے پہنچا۔
کاروائی میں دونوں لیپرڈ کیٹ کو صحیح سلامت برآمد کیا گیا، سندھ وائلڈ لائف ڈپارٹمنٹ اب انہیں اسلام ۤآباد وائلڈ مینجمنٹ کے حوالے کردے گا جو انہیں مارگلہ کی پہاڑیوں پر چھوڑ دیں گے۔
جاویدمہر کے مطابق برآمد کی گئی لیپرڈ کیٹ کا جوڑا ہے جس میں ایک نر اور ایک مادہ ہے۔ انکی عمر 8 ماہ ہے۔ بلیوں کی کھال اور انکی خوبصورتی کی وجہ سے انہیں غیرقانونی طور پر پکڑ کر فروخت کیا جاتا ہے۔ جوڑے کی قیمت ڈیڑھ لاکھ روپے تک لگائی جاتی ہے۔
