-
-
پاکستان پیپلز پارٹی نے الیکشن کمیشن کی جانب سے لوکل گورنمنٹ شیڈول کے خلاف آج کراچی کے مختلف مقامات پر احتجاج اور مظاہروں کا اعلان کیا ہے۔
تفصیلات کے مطابق پاکستان پیپلز پارٹی سندھ کے صدر سینیٹر نثار آحمد کھوڑو کی ہدایت پر کراچی سمیت سندھ بھر میں الیکشن کمیشن کے تمام ضلعی ہیڈ کواٹرز کے باہر احتجاج کیا جائے گا۔
پاکستان پیپلز پارٹی کی جانب سے کراچی میں 5 مقامات پر احتجاج اور مظاہرے کئے جائیں گے جسکا شیڈول جاری کردیا گیا۔ تمام مقامات پر احتجاج سہ پہر 3 بجے نماز جمعہ کے بعد کیا جائے گا۔
کراچی میں ضلع ویسٹ میں حبیب بینک چورنگی پر ڈی سی آفس کے سامنے احتجاج ہوگا۔ ضلع ملیر میں ملیرہالٹ، ضلع وسطی میں ڈسٹرکٹ سینٹرل ڈی سی آفس جبکہ ضلع ساؤتھ میں کوتوال بلڈنگ کے سامنے احتجاج ہوگا۔
اسی طرح کراچی میں ضلع کورنگی کا مظاہرہ کورنگی ڈھائی نمبر پر واقع ڈی سی آفس کے باہر ہوگا۔ پیپلز پارٹی نے تمام کارکنان اور رہنماؤں سے احتجاج میں شامل ہونے کی ہدایت کی ہے۔
واضح رہے الیکشن کمیشن کا کہنا ہے کہ سندھ لوکل گورنمنٹ انتخابات میں تمام منتخب ارکان کی تقریب حلف برداری 22 مئی کو ہوگی، جبکہ مخصوص نشستوں پر الیکشن کا شیڈول بھی جاری کر دیا گیا ہے۔ الیکشن کمیشن کے مطابق 22 مئی کو منتخب یوسی چیئرمین، وائس چیئرمین، ممبر ڈسڑکٹ کونسلز اور وارڈ کونسلرز کا حلف ہوگا۔
دوسری جانب الیکشن کمیشن نے سندھ میں تمام کیٹگریز کی مخصوص نشستوں پر انتخاب کا شیڈول جاری کیا ہے، انتخابات کے لیے ڈی آر اوز، آر اوز کی تعیناتی کا نوٹی فکیشن بھی جاری کیا گیا ہے۔
انتخابی شیڈول کے تحت یونین کونسلز اور یونین کمیٹیز میں اقلیت کی 1 خاتون 2، نوجوان 1 اور مزدور یا کسان کی 1 نشست پر امیدوار 22 سے 24 مئی تک کاغذات جمع کراسکیں گے۔ امیدواروں کے کاغذات کی جانچ پڑتال 26 مئی تک ہوگی، 6 جون کو مخصوص نشستوں پر الیکشن اور 14 جون کو حلف ہوگا۔
کراچی میٹروپولیٹن کارپوریشن، ڈسٹرکٹ کونسلز اور ٹاؤن میونسپل کارپوریشن کی مخصوص نشستوں پر منتخب مخصوص افراد کی حلف برداری 10 جون کو ہوگی۔
میونسپل کمیٹیز، ڈسڑکٹ کونسل، بلدیہ عظمی کراچی، ٹاؤن کمیٹیز اور ٹاؤن میونسپل کونسلز کی مخصوص نشستوں پر بھی 24 مئی تک کاغذات نامزدگی جمع ہوں گے۔
تین سے 4 جون کے دوران سیاسی جماعتوں کی نشستوں کی بنیاد پر کراچی میونسپل کارپوریشن اور 25 ٹاؤنز میں مخصوص نشستوں کی تقسیم ہوگی۔ ملکی تاریخ میں پہلی مرتبہ خواجہ سراؤں کو سندھ کی بلدیاتی کونسلز میں مخصوص نشستوں کے ذریعے نمائندگی ملے گی۔
واضح رہے کہ الیکشن کمیشن کے مطابق کراچی کے بلدیاتی انتخابات میں پیپلز پارٹی کی نشستوں کی تعداد 99، جماعت اسلامی 86، پی ٹی آئی 41 اور مسلم لیگ ن 7 نشستوں پر کامیاب ہوئی۔
