پاکستان کی قومی ایئرلائن (پی آئی اے) کی جانب سے عیدالفطر کے موقع پر اندرون ملک سفر کرنے والے مسافروں کیلئے کرایوں میں کمی کا اعلان کردیا گیا۔
میڈیا رپورٹ کے مطابق قومی ایئرلائنز نے عیدالفطر کے موقع پر عوام کیلئے ٹِکٹ سستے کرنے کا اعلان کیا ہے۔ قومی ایئرلائنز نے اندرونِ ملک سفر کرنے والے مسافروں کے لیے کرایوں میں 10 فیصد تک رعایت کا اعلان کیا ہے۔
ترجمان پی آئی اے کے مطابق مسافر 22 اور 23 اپریل سے اس رعایتی اسکیم سے استفادہ کرسکتے ہیں۔ پی آئی اے کی جانب سے کرایوں میں کمی کا اعلان عیدالفطر کے 2 دن کے لیے کیا گیا ہے۔
ترجمان پی آئی کا کہنا ہے کہ کرایوں میں کمی کا مقصد مسافروں کو عید کی خوشیوں میں شامل کرنا ہے تاکہ شہری باآسانی اپنے آبائی علاقوں میں عید منانے کیلئے سفر کرسکیں۔
واضح رہے کہ پی آئی اے ہر سال عید پر عوام کی سہولت کیلئے تحفے کے طور پر کرایوں میں کمی کا اعلان کرتی ہے جس کا مقصد یہ ہے کہ شہری اپنے پیاروں سے ملنے کم کرایوں میں ایک شہر سے دوسرے شہر با آسانی سفر کرسکیں۔
