سوشل میڈیا پلیٹ فارم فیس بک اور انسٹاگرام کی مالک کمپنی میٹا نے ٹوئٹر کا مقابلہ کرنے کے لیے اپنی نئی ایپ تھریڈز لانچ کر دی۔ چند ہی گھنٹوں میں لاکھوں میں اکاؤنٹ بن گئے۔
فیس بک کے بانی اور میٹا کمپنی کے مالک مارک زکربرگ نے نئی ایپ ’تھریڈز‘ پر پہلی پوسٹ کرتے ہوئے خوش آمدید کہا۔ مارک زکربرگ کے مطابق نئی ایپ تھریڈز کے لانچ ہونے کے چند ہی گھنٹوں کے دوران 50 لاکھ افراد نے اکاؤنٹ بنائے۔
نئی ایپ تھریڈز کے بارے میں میٹا کا کہنا ہے کہ یہ ایک ٹیکسٹ بیسڈ کانورزیشن (Text Based Conversation) ایپ ہے جسے انسٹاگرام سے منسلک کیا جائے گا۔
تھریڈز کو آپ اپنے انسٹاگرام لاگ ان کا استعمال کرتے ہوئے بھی سائن اپ کرسکتے ہیں، جس کے بعد آپ ان تمام اکاؤنٹس کو فالو کرنے کے قابل ہو جائیں گے جنہیں آپ پہلے ہی انسٹاگرام پر فالو کر رہے ہیں۔
آپ تھریڈز پر 500 حروف تک کی پوسٹس کرسکتے ہیں، جن میں تصاویر، Gifs اور پانچ منٹ تک کی ویڈیوز شامل ہیں۔ یہ کافی حد تک ٹوئٹر کی طرح ہی ہے، جس میں مختصر ٹیکسٹ پوسٹ، لائک اور ری پوسٹس شامل ہیں۔ آپ ایک تھریڈ کو کوٹ ٹویٹنگ کی طرح کوٹ کر سکتے ہیں۔
