پاکستان میں عیدالفطر کے آغاز میں ایک ہفتے سے بھی کم وقت باقی رہ گیا ہے۔ ہر سال کی طرح اس سال بھی عید کے موقع پر نئی فلمیں ریلیز کی جائیں گی۔
رواں سال عیدالفطر پر 5 نئی فلمیں سینما گھروں کی زینت بنیں گی اور پانچ نئی فلموں میں سے 4 اردو زبان جبکہ ایک پنجابی زمان کی فلم ہے۔ تمام فلمیں الگ الگ کیٹگری پر مبنی ہیں جس میں ایکشن، پراسر ڈکیتی، رومانس اور مزاح بھی شامل ہے۔
منی بیک گارنٹی
پاکستان کی میگا بجٹ فلم ’منی بیک گارنٹی‘ کی اس سال سب سے زیادہ دھوم ہے، جس میں معروف اداکار فواد خان، جاوید شیخ، میکال ذولفقار، گوہر رشید، عائشہ عمر اور دیگر کئی اداکاروں کاسٹ میں شامل ہیں۔
فلم کی خاص بات یہ ہے کہ پاکستانی کرکٹ ٹیم کے سابق کپتان وسیم اکرم اور ان کی اہلیہ شہنیرا اکرم ڈیبیو دے رہے ہیں۔ فلم کے ہدایت کار معروف کمرشل ڈائیریکٹر فیصل قریشی ہیں۔
فلم کی کہانی ایک بینک ڈکیتی کے پس منظرمیں ہے، یہ فلم 7 افراد کی زندگیوں کے گرد گھومتی ہے،کہا جارہا ہے کہ یہ فلم نہ صرف پاکستانیوں کے لیے بلکہ پوری دنیا کے لوگوں سے متعلق ہے۔
دلدل
کراچی کے انڈر گراؤنڈ کلچر پر مبنی کرائم تھرلر فلم دلدل بھی عید الفطر پر ریلیز کی جائے گی، دلدل فلم میں اداکارہ سونیا حسین مرکزی کردار نبھا رہی ہیں۔
فلم کے ہدایت کار ابو علیحہ ناظرین کو مسلسل تفریحی کہانیاں فراہم کرنے کے لیے جانے جاتے ہیں۔ انہوں نے کئی سالوں میں متعدد فلمیں بنائی ہیں جس میں انڈسٹری کے بڑے ناموں نے دلچسپ اور مخصوص کہانیوں کے ساتھ اداکاری کی ہے۔
فلم کے ٹریلر کے مطابق سونیا حسین خطرناک کاموں میں ملوث امیر لوگوں کے ایک گینگ کو قتل کرتے نظر آتی ہیں، اس دوران ان کا پیچھا انسپکٹر کرتے ہیں جس کا کرادر محسن عباس حیدر کررہے ہیں۔ فلم میں شمعون عباسی، مائرہ خان، رضوان جعفری اور عدنان شاہ ٹیپو بھی اہم کردار ادا کر رہے ہیں۔
ڈور
دیم چیمہ کی ایکشن اور کامیڈی سے بھرپور فلم ڈور بھی اس سال ریلیز کی جائے گی۔ فلم کے نمایاں ستاروں میں اسد محمود، سلیم معراج اور شفقت چیمہ شامل ہیں۔ یہ فلم ایکشن سے بھرپور ہوگی جس میں لڑائی، بندوقوں اور رومانوی سین بھی دکھائے گئے ہیں۔
ہوئے تم اجنبی
شاہد فلمز اور مانڈوی والا انٹرٹینمنٹ کے زیر اہتمام بنائی گئی فلم ہوئے تم اجنبی میں میں میکال ذوالفقار اور سعدیہ خان مرکزی کردار ادا کررہے ہیں۔ یہ فلم معروف اینکر و ہدایت کار اور اداکار شاہد کے صاحبزادے کامران شاہد نے تحریر کی ہے۔
فلم کی کہانی میں ناظرین کو 1971 کی جنگ کے پس منظر میں ہونے والی ان کہی محبت کی داستانوں میں واپس آنے کا موقع فراہم کیاگیا ہے جبکہ اس کے ساتھ ساتھ اس میں سب سے زیادہ دلکش رومانوی کہانیوں میں سے ایک کو غیرمعمولی فلیش بیک کے ساتھ ناظرین کو پیش کیا گیا ہے۔
لاہور قلندر
س عید پر پنجابی فلمیں بھی ریلیز ہوں گی جن میں شاہد رانا کی فلم لاہور قلندر ہے۔ اس فلم میں صائمہ نور کے ساتھ بنتو بٹ، شفقت چیمہ اور شہریار چیمہ بھی جلوہ گر ہوں گے۔
فلم کی کاسٹ اور پروڈیوسرز کامیابی کے لیے پرعزم ہیں جن کا دعویٰ ہے کہ فلم شائقین کے دل جیتنے میں کامیاب ہوگی۔
