-
-
سندھ ہائی کورٹ نے بے نظیر بھٹو میڈیکل یونیورسٹی کی وائس چانسلر ڈاکٹر انیلا رحمان کو انکے عہدے پر بحال کرنے کا حکم دے دیا۔ خواتین کے ہاسٹلز میں لیڈی کمانڈوز تعینات کرنے کی بھی ہدایات جاری کردیں۔ ڈاکٹر انیلا رحمان کو دو طلبہ کی خودکشی کے بعد جبری رخصت پر بھیج دیا گیا تھا۔
سندھ ہائی کورٹ میں ڈاکٹر انیلا رحمان کی جانب سے دائر کردہ درخواست کی سماعت ہوئی۔ درخواست کی سماعت جسٹس آفتاب احمد گورر کی سربراہی میں دو رکنی بینچ نے کی۔ ڈاکٹر انیلا رحمان نے اپنی جبری رخصت کو عدالت میں چیلنج کرتے ہوئے ابتدائی تحقیقاتی رپورٹ طلب کرنے کی استدعا کی تھی۔
ڈان اخبار کی رپورٹ کے مطابق عدالت نے گزشتہ سماعت میں ہی ابتدائی تحقیقاتی رپورٹ پیش کرنے کی ہدایت کردی تھی۔ عدالت نے تمام پیش رفت کا جائزہ لیتے ہوئے ڈاکٹر انیلا رحمان پر عائد کئے گئے الزامات کو خارج کردیا۔
دو رکنی بینچ نے اپنے حکم میں کہا کہ درخواست گزار پر لگائے گئے الزامات اب تک ثابت نہیں کئے جاسکے اور ریکارڈ میں انکے خلاف کوئی مواد بھی نہیں ملا ہے۔ عدالت ڈاکٹر انیلا رحمان کو بے نظیربھٹو میڈیکل یونیورسٹی میں بطور وائس چانسلر اپنی خدمات جاری رکھنے کی اجازت دیتی ہے۔
سندھ ہائی کورٹ نے صوبے بھر کی تمام سرکاری جامعات اور کالجز کے گرلز ہاسٹلز میں لیڈی پولیس کمانڈوز تعینات کرنے کی بھی ہدایات جاری کی ہیں۔
