سندھ ہائی کورٹ میں کراچی کے علاقے نارتھ ناظم آباد میں تعمیر ہونے والی غیرقانونی عمارت کے کیس سے متعلق سماعت ہوئی۔ عدالت نے بلڈر کو فوری طور پر تعمیر روکنے کا حکم دے دیا۔
تفصیلات کے مطابق نارتھ ناظم آباد بلاک آئی کے پلاٹ نمبر سی 140 پر عمارت میں پورشن بنائے جارہے ہیں۔ جس پر درخواست گزار نے تعمیر روکنے کی درخواست کی۔
سماعت کے دوران عدالت نے سوال کیا کہ اس کیس میں پہلے ہی حکم امتناعی جاری کیا جاچکا ہے جس پر درخواست گزار کے وکیل نے استدعا کی کہ حکم امتناعی کے باوجود بلڈر عمارت میں پورشن تعمیر کررہا ہے۔
درخواست گزار کے وکیل نے عدالت کو بتایا کہ سندھ بلڈنگ اینڈ کنٹرول اتھارٹی کے حکام غیر قانونی تعمیرات کو روکنے میں ناکام ہوچکے ہیں۔ بلاک آئی میں خلاف قانون تعمیرات کی جارہی ہیں۔
عدالت نے سندھ بلڈنگ اینڈ کنٹرول اتھارٹی کو مذکورہ پلاٹ پر فوری ایکشن لینے اور بلڈر کو تعمیر روکنے کا حکم جاری کردیا۔ عدالت نے ایس بی سی اے حکام کو 30 دنوں میں عمل درآمد رپورٹ بھی جمع کرانے کی ہدایت کی۔
