الیکشن کمیشن آف پاکستان نے ڈسٹرکٹ ریٹرنگ آفیسرز اور ریٹرنگ آفیسرز کی ٹریننگ کل سے شروع کرنے کا اعلان کیا ہے۔ ای سی پی نے ڈی آر اوز اور آر اوز کی گزشتہ روز تعیناتی کی تھی۔
الیکشن کمیشن کے مطابق عام انتخابات 2024 کے لئے ڈسٹرکٹ ریٹرننگ آفیسرز اور ریٹرننگ آفیسرز کی تعیناتی کے بعد ان کی فوری جامع ٹریننگ کل مورخہ 13دسمبر 2023 سے شروع کی جار ہی ہے۔الیکشن کمیشن نے ٹریننگ کے تمام انتظامات مکمل کرلئے ہیں۔
الیکشن کمیشن کے سینئر افسران تمام ڈسٹرکٹ ریٹرننگ افسران اور ریٹرننگ افسران کو ٹریننگ دیں گے۔ ان افسران کو انتخابی عمل، انتخابی قوانین و انتخابات سے متعلق دیگر انتظامی امو رپر ٹریننگ دی جائے گی ۔ 142 ڈسٹرکٹ ریٹرننگ افسران کو چاروں صوبائی ہیڈ کواٹزر میں مورخہ 16 دسمبر 2023 کو ایک روزہ ٹریننگ دینے کا انتظام کیا گیا ہے۔
اس میں پنجاب کے 40، خیبر پختونخوا 36 ،بلوچستان کے 36 اور سندھ کے 30 ڈسٹرکٹ ریٹرننگ افسران شامل ہیں۔ ریٹرننگ افسران کو ڈویژنل سطح پر دو روزہ انتخابی ٹریننگ دی جائے گی۔ جوکہ 13 سے 15 دسمبر تک جاری رہے گی ۔
ٹریننگ میں پنجاب کے 441 ریٹرننگ افسران ، خیبر پختونخوا کے 160ریٹرننگ افسران ،سندھ کے 191 اور بلوچستان کے 67 ریٹرننگ افسران شامل ہیں ۔ مجموعی طور پر 859 ریٹرننگ افسران تربیت حاصل کریں گے۔
