معروف ٹی وی اینکر پرسن اور سابق رکن قومی اسمبلی عامر لیاقت کے اہلخانہ نے ان کی قبرکشائی اور پوسٹ مارٹم رکوانے کے لیے عدالت سے رجوع کرلیا۔
عامر لیاقت حسین کے صاحبزادے اور صاحبزادی نے جوڈیشل مجسٹریٹ کے 23 جون کے حکم کے خلاف سندھ ہائیکورٹ میں ایک آئینی درخواست دائر کی ہے۔
درخواست میں عامر لیاقت کا پوسٹ مارٹم روکنے اور درخواست کو فوری سماعت کے لیے مقرر کرنے کی بھی استدعا کی گئی ہے۔عامر لیاقت حسین کے بچوں کی درخواست پر سندھ ہائیکورٹ کا دو رکنی بینچ آج ہی سماعت کرے گا۔
جوڈیشل مجسٹریٹ نے عامر لیاقت کے پوسٹ مارٹم کے لیے قبرکشائی کا حکم دیا تھا۔ مجسٹریٹ کے حکم کے مطابق 23 جون بروز جمعرات صبح 9 بجے قبرکشائی کی جانی ہے جسکے لئے میڈیکل بورڈ بھی تشکیل دیا جاچکا ہے۔
واضح رہےکہ ممتاز ٹی وی اینکر، مقرر اور ایم این اے عامر لیاقت 9 جون کو اپنے کمرے میں بے ہوش پائے گئے تھے، ملازمین کی اطلاع پر عامر لیاقت کو اسپتال منتقل کیا گیا جہاں ان کی موت کی تصدیق کی گئی۔
انتقال کے بعد پولیس کی کوششوں کے باوجود عامر لیاقت حسین کے اہلخانہ نے پوسٹ مارٹم سے انکار کردیا تھا۔ پوليس حکام کا موقف تھا کہ موت کی وجہ کا تعين نہ ہونے کی وجہ سے پوسٹ مارٹم ضروری ہے۔
عامر لياقت کے اہل خانہ نے عدالت سے رجوع کيا تھا اورجوڈيشل مجسٹريٹ کے ہمراہ پوليس سرجن کی جانب سے معائنہ کرنے کے بعد ميت ورثا کے حوالے کردی گئی تھی جسکے بعد عامرلیاقت کو عبداللہ شاہ غازی سے متصل قبرستان میں سپردخاک کردیا گیا تھا۔
