قومی ایئرلائن کا بعد از حج آپریشن آج شروع ہوگیا۔ فریضہ حج ادا کرنے والے حجاج کرام کو لے کر پی آئی اے کی فلائٹ جناح انٹرنیشنل ایئرپورٹ کراچی پہنچ گئی۔
پی آئی اے کی فلائٹ پی کے 832 سے 363 عازمین حج کو کراچی پہنچایا گیا۔ جناح انٹرنیشنل ایئرپورٹ پر گورنرسندھ کامران ٹیسوری سے حجاج کرام کا استقبال کیا اور انہیں فریضہ حج ادا کرنے پر مبارکباد دیتے ہوئے ہار پہنائے۔
کامران ٹیسوری کا کہنا تھا کہ انہوں نے تمام حاجیوں سے خیریت دریافت کی۔ تمام حجاج کرام کا کہنا تھا کہ انہوں نے پاکستان کیلئے، پاکستان کی معیشیت کیلئے بہت دعائیں کیں۔ کچھ لوگوں نے پاکستان زندہ باد کے نعرے بھی لگائے۔
گورنر سندھ کا کہنا تھا کہ یہی وہ جذبہ ہے جس سے ہم پاکستان کو اور ترقی دے سکتے ہیں۔ وہ تمام حجاج کرام کے ساتھ پورے پاکستان کو حج اور عید کی مبارکباد دیتے ہیں۔
حجاج کرام کو لے کر قومی ایئرلائن کی ایک فلائٹ لاہور جبکہ ایک اسلام آباد بھی پہنچ چکی ہے جبکہ آج شام عازمین حج کی ایک پرواز پشاور بھی پہنچے گی۔
پہلے روز پی آئی اے کی تمام پروازیں جدہ ایئرپورٹ سے روانہ ہوئی ہیں۔ پی آئی اے مجموعی طور پر 268 پروازوں کے ذریعے 61 ہزار 467 حجاج کو لے کر سعودی عرب سے پاکستان پہنچائے گی۔
