-
-
وفاقی وزیر داخلہ رانا ثناء اللہ نے سابق وزیراعظم عمران خان کی عدالتی ضمانت ختم ہوتے ہی انہیں گرفتار کرنے کا عندیہ دے دیا۔ رانا ثناء اللہ کا کہنا ہے کہ عمران خان کو جو سیکیورٹی دی گئی ہے اسکے اہلکار ہی انہیں گرفتار کریں گے۔
عمران خان کی بنی گالہ واپسی پر ردعمل دیتے ہوئے وزیر داخلہ رانا ثناء اللہ کا کہنا تھا کہ عمران نیازی کو اسلام آباد واپسی پر خوش آمدید کہتے ہیں، قانون کے مطابق عمران نیازی کو سکیورٹی فراہم کی جا رہی ہے۔
عمران خان دو درجن سے زائد مقدمات میں ملزم نامزد ہیں، ان مقدمات میں ملک میں ہنگامہ آرائی، فتنہ و فساد اور افراتفری پھیلانا شامل ہے، مقدمات میں وفاق پر مسلح حملوں کے جرائم بھی شامل ہیں۔
رانا ثناء اللہ کا کہنا تھا کہ عدالتی ضمانت ختم ہونے پر عمران خان کی سکیورٹی پر مامور اہلکار ہی انہیں گرفتار کرلیں گے۔
چیئرمین پی ٹی آئی کو تنقید کا نشانہ بناتے ہوئے وزیر داخلہ کا کہنا تھا عمران خان کے مقدمات میں وفاق پر مسلح حملوں کے جرائم بھی شامل ہیں، ملک میں فساد فی الارض مچانے والا اخلاقی، جمہوری قدروں سے عاری ہے۔
انہوں نے سوال کیا کہ جو اپنے مخالفین کو کبھی غدار اور یزید کہہ کر پکارتا ہے، ایسا شخص جمہوری معاشرے میں سیاسی جماعت کا سربراہ ہوسکتا ہے؟ یہ پوری قوم کیلئے لمحۂ فکریہ ہے۔
