-
-
پاکستان پیپلز پارٹی کی رہنما شرمیلا فاروقی کی والدہ انیسہ فاروقی کا مذاق بنانے کے کیس میں وفاقی تحقیقاتی ادارے (ایف آئی اے) کے سائبر کرائم ونگ نے نادیہ خان کو بری الذمہ قرار دے دیا ہے۔
ایف آئی اے سائبر کرائم سندھ کے سربراہ عمران ریاض نے انسٹاگرام پر ایک ویڈیو شیئر کی اور بتایا کہ شرمیلا فاروقی کی جانب سے نادیہ خان کے خلاف دائر ہتک عزت کے کیس میں نادیہ خان کو کلیئر کردیا گیا ہے۔
عمران ریاض نے وضاحت کی کہ ویڈیو 40 منٹ کی تھی جو اداکارہ صبور علی کی شادی پر بنائی گئی تھی جسے نادیہ نے یوٹیوب چینل پر پوسٹ کیا تھا۔ انکی ٹیم نے ویڈیو کا تفصیلی جائزہ لیا۔
عمران ریاض کے مطابق ویڈیو میں انہیں ایسا کوئی مواد نظر نہیں آیا جس سے یہ ثابت ہو کہ نادیہ نے جان بوجھ کر شرمیلا فاروقی کی والدہ کو بدنام کرنے کی نیت سے اس ویڈیو کو بنایا ہے۔
سائبر کرائم سندھ کے سربراہ کا کہنا ہے کہ جہاں تک طنزیہ انداز کی یا چہرے کے تاثرات کی بات ہے تو اس کے حوالے سے کوئی قانون موجود نہیں ہے۔ اس لئے نادیہ خان کو بری الذمہ قرار دے کر کیس کی تحقیقات کو بند کردیا گیا ہے۔
نادیہ خان نے عمران ریاض کی ویڈیو کو انسٹاگرام پر شیئر کیا اور ہتک عزت کے کیس میں بری ہونے کے بعد خدا کا شکر اداکیا اور لکھا کہ ہمیشہ سچ کی جیت ہوتی ہے۔
واضح رہے گزشتہ ماہ نادیہ خان کی ایک ویڈیو وائرل ہوئی تھی جس میں نادیہ خان شرمیلا فاروقی کی والدہ سے انکے میک اپ کے بارے میں پوچھتی ہیں کہ آپکا میک اپ کون کرتا ہے ؟
ویڈیو پر سوشل میڈیا صارفین سمیت شرمیلا فاروقی نے سخت تنقید کی ۔ شرمیلا فاروقی نے نادیہ خان کے خلاف سائبر کرائم میں رپورٹ درج کرائی اور انہیں 5 کروڑ کا ہتک عزت کا نوٹس بھجوایا۔
