ڈراموں، فلموں، ریڈیو اور تھیٹر کے معروف ایوارڈ یافتہ اداکار طلعت حسین زائد العمری سمیت بیماریوں کے باعث شدید علیل ہوکر بستر تک محدود ہوگئے۔
میڈیا رپورٹس کے مطابق طلعت حسین طویل العمری سمیت دیگر طبی پیچیدگیوں کے باعث کچھ سال سے اسکرین سے دور ہیں اور اب وہ انتہائی علیل ہوکر بستر اور ویل چیئر تک محدود ہوگئے۔
جنگ اخبار کے مطابق طلعت حسین کی شریک حیات رخشندہ طلعت کے کہنا ہے کہ بہت زیادہ سگریٹ نوشی کرنے کی وجہ سے ان کے شوہر کے پھیپھڑے کمزور ہوچکے ہیں، جن میں بار بار پانی بھر جاتا ہے۔
انہوں نے بتایا کہ پھیپھڑوں سے پانی نکالنے کے لیے انہیں متعدد بار ہسپتال منتقل کیا گیا اور کمزوری کی وجہ سے وہ گھر میں گر بھی پڑے تھے، جس وجہ سے اب وہ ویل چیئر اور بستر تک محدود ہوچکے ہیں۔
اداکار کی اہلیہ نے کہا کہ شوہر نے فن کو پوری زندگی دی اور اب ان کے علاج پر اچھا خاصا خرچ ہو رہا ہے، اگر حکومت کا ثقافتی ادارہ مدد کرنا چاہے تو وہ انکار نہیں کریں گے۔ انہوں نے کہا کہ حکومت سمیت کسی سے بھیک نہیں مانگوں گی لیکن حکومت کا فرض ہے کہ پوری زندگی فن کو دینے والے شخص کا علاج کروائے۔
طلعت حسین کی عمر 80 سال سے زائد ہے اور انہوں نے فنون لطیفہ کو نصف صدی دی ہے، یعنی انہوں نے اپنی عمر کا بیشتر حصہ اداکاری، صداکاری، آرٹ اور فن کو دی۔ طلعت حسین نے 1970 سے قبل ہی اداکاری کا آغاز کم عمری میں ہی شروع کردیا تھا لیکن انہیں 1970 کے بعد شہرت ملنا شروع ہوئی۔
لندن سے تعلیم حاصل کرنے والے طلعت حسین نے پاکستان ٹیلی وژن (پی ٹی وی) سے اداکاری کا آغاز کیا اور انہوں نے برطانوی ٹی وی سمیت بولی وڈ فلموں میں بھی کام کیا۔
